भांगरभूंय | प्रतिनिधी
पणजी: गोंयान आपले आंतरराष्ट्रीय संबंद आनीक घटमूट केले. नॉर्वेंचें एक उंचेल्या पांवड्या वेलें प्रतिनिधी मंडळ गोंयचे भेटीर आयलें आनी म्हायती तंत्रज्ञान, इलेक्ट्रॉनिक्स आनी कम्युनिकेशन्स विभाग (डीआयटीईअॅण्डसी) आनी पर्यटन विभाग हांच्या जोड पालवान आयोजीत केल्ले बसकेंत वांटेकार जाले. हे बसकेंत तंत्रज्ञान, पर्यटन, कुशळटाय विकास आनी क्रिएकटिव्ह इकॉनॉमीतल्या सहकार्याच्या संदीचेर चर्चा जाली.
हे बसकेंत म्हायती तंत्रज्ञान, इलेक्ट्रॉनिक्स आनी कम्युनिकेशन्स तशेंच पर्यटन मंत्री रोहन खंवटे, डीआयटीईएन्डसीचे संचालक कबीर शिरगांवकार, जोड संचालक डॉ. मिलिंद साखरदांडे, जीटीडीसीचे जीएम (मार्केटिंग) डॉ. गॅवीन डायस, स्टार्टअप अॅण्ड आयटी प्रमोशन सेलचे मुखेल कार्यकारी अधिकारी डी. एस. प्रशांत, तशेंच गोंयांतले किलोवॉट कंपनीचे प्रतिनिधी कॅलेब फर्नांडीस आनी जुदाह बेन फर्नांडीस हे मानेस्त हाजीर आशिल्ले.
ह्या वेळार मंत्री खंवटे हांणी म्हणलें गोंय तंत्रज्ञान, क्रिएटिव्हिटी आनी टिकावू पर्यटन हांकां एकठांय हाडपी एक आधुनीक इकोसिस्टम तयार करीत आसा. इलेक्ट्रॉनीक मॅन्युफॅक्चरींग क्लस्टर, एआय कुशळटाय विकास कार्यावळ आनी घटमूट स्टार्टअप धोरणाक लागून आंतरराष्ट्रीय सहकार्याक खूबशे नवे मार्ग उपलब्ध जायत आसात. पर्यटन मळारून आमी तंत्रज्ञान, अणभवाचेर आदारीत प्रवास आनी शास्वत पद्दती हांचो चडांत चड वापर करीत आसात.
ह्या वेळार नॉर्वेंच्या प्रतिनिधींचेंय उलोवप जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
