भांगरभूंय | प्रतिनिधी
इंटरनॅट ही आयज लोकांची मुळावी गरज. इंटरनॅटाक लागून सोशल मिडिया चलता. फेसबूक, यू ट्यूब, वॅबसायटी, एक्स (ट्विटर), इन्स्टाग्राम, टेलेग्राम अशा साबार अॅपांक लागून मनोरंजनाच्या मळाचेर क्रांती जाल्या. लोकांचें तें पोट भरपाचें साधन जालां. वेवसाय संवसाराच्या खाची- कोनशांनी पावोवपाक तांणी मजत केल्या. एमेझोन, पेटीएम, गुगल पे सारक्या अॅपांनी अर्थीक मळाक बरकत हाडल्या. आमच्या देशाची लोकसंख्या चड म्हणटकच हांगा इंटरनॅट वापरपी लोकूय चड. हालींच इंटरनॅट आनी मोबायल असोसिएशन ऑफ इंडियाचो (आयएएमएआय) 2023 वर्साचो अहवाल उजवाडाक आयला. तातूंत लोकसंख्येचे तुळेन इंटरनॅट वापरप्यांच्या मळाचेर गोंय देशांत पयल्या क्रमांकाचेर आसा. 1 जानेवारी ते 31 डिसेंबर 2023 ह्या काळांत गोंयांतल्या 73 टक्के लोकांनी इंटरनॅटाचो वापर केला. ही गोंयाक अभिमानाची गजाल काय हुस्क्याची, तें दरेका गोंयकारान थारावचें.
गोंया उपरांत महाराष्ट्र आनी केरळाचो क्रमांक लागता. थंय वट्ट लोकसंख्येच्या 69 टक्के लोकांनी इंटरनॅट वापरलां. साबार राज्यां आनी केंद्रशासीत प्रदेशांची ही वळेरी. तातूंत निमाण्या क्रमांकाचेर आसा बिहार. थंय फक्त 37 टक्के लोकांनी इंटरनॅटाचो वापर केला. अर्थांत बिहाराची अर्दी लोकसंख्या दुसर्या राज्यांनी रावता. म्हणटकच हो आंकडो 50 टक्के धरूं येता. उत्तर प्रदेशांत 41 टक्के लोकांनी इंटरनॅट वापरलां. झारखंडांत हो आंकडो 46 टक्के इतलो आसा. विशेश म्हणल्यार 2022 वर्साचे तुळेंत सगल्याच राज्यांनी हो आंकडो वाडत आसा. फुडल्या 10 वर्सांनी कांय राज्यांनी तो शेंकडो मारतलो अशें दिसता. मात, ते खातीर डेटाचें मोल उणें जावपाक जाय. उरफाटें तें वाडत आसा. 99 रुपयांक तीन म्हयन्याचो डेटा दिवपी कंपनीं आयज 700 रुपया घेतात.
आयएएमएआयच्या डेटा प्रमाण, शारां परस गांवांनी इंटरनॅटाचो वापर चड वाडला. आमच्या देशांत गांव चड आशिल्ल्यान हें जाता आसतलें. सोशल मिडियाचो वापर गांवांतलेच लोक तशे चड करतात. सुमार 82 कोटी लोकांनी वेगळ्यावेगळ्या कारणांक लागून इंटरनॅटाचो वापर केलो. तातूंत 44 कोटी गांवांतले आनी 38 कोटी लोक शारांतले आशिल्ले. हातूंतले 90 टक्के लोकांनी दर दिसा इंटरनॅटाचो वापर केलो. व्हडलेंशें अजाप ना. खास करून तरणाटे दर दिसा सरासरी देड वर इंटरनॅटाचेर घालयतात. देड वर ही सरासरी, पूण कांय तरणाटे तीन ते स वरां पसून सोशल मिडिया धवळीत आसतात. दीसभर दुसरें कांयच काम नासल्यार अक्षरशा दोळे दुखसर वा न्हिदेचो वेळ सोडलो जाल्यार दोळ्यांक मोबायल फोन लावन बशिल्ले तरणाटे तुमचे भोंवतणी पसून दिसतले. घडये घरांतूय!
82 कोटी लोकांनी पोरूं वर्सभर इंटरनॅट वापरलो. पूण नेमको कित्या खातीर? 70 कोटी लोकांनी ओटीटीचेर सिनेमा, टिव्ही माळो पळयल्यो. 62 कोटी लोकांनी फेसबूक, व्हॉट्सअॅप आनी हेर सोशल मिडिया खातीर इंटरनॅट वापरलो. जाल्यार सुमार 42 कोटी लोकांनी डिजिटल पेमेंट खातीर वापर केलो. वेपार मळाचेर इंटरनॅट वापर आतां सक्तीचोच जाला. सरकारांय आतां स्वताच्यो सेवा ऑनलायन करपाचीं आसात. सर्वसादारण समजा प्रमाण चडशे लोक फक्त आनी फक्त सोशल मिडिया खातीर इंटरनॅट वापरतात. पूण, आतां सिनेमा पळोवप्यांचो आंकडो तांचे परस आठ कोटींनी चड आशिल्ल्याचें सिद्ध जालां. सिनेमा मळाचेर वावुरपी निर्माते, दिग्दर्शक, अभिनेते ओगीच ओटीटी कडेन वळूंक नात. आनीक 20 वर्सांनी थेटरांनी लागपी सिनेमा पळोवपाक कोण वतले काय नात, हो दुबाव आसा.
इंटरनॅटाचो वापर करून मोबायलाचेर कितें- कितें धवळीत बसप हें भलायकेचें लुकसाण करपी आसा, हाचोय विचार जाय. सोशल मिडियाक लागून समाजांत फूट पडल्या. दुस्वास वाडला. विवीध पोस्टां सकयले कमेंट वाचीत जाल्यार बुद्द घाणाक दवरूंक नाशिल्लो कोणूय हें सांगीत. मोबायल फोन चड वापरिल्ल्यान दोळ्यांचीं दुयेंसां वाडल्यांत, हातूंत दुबाव ना. ताका लागून पालकांचेर व्हडली जापसालदारकी आयल्या. सोशल मिडियाक लागून भुरग्यांची अभ्यासा कडेन आडनदर जाल्या. मोबायल फोनाचेर सोशल मिडिया सुरू जावचे पयलीं पसून घरांत एकठांय बसून जेवताले, गजाली मारताले, सोयऱ्यांगेर वताले. आतां सगलें सोशल मिडिया वरवीं चलता. घरांतल्या घरांत संदेश धाडपी पसून आसतले. नातीं, समाजीक, कुटुंबीक जीण सोशल मिडियान बदल्ल्या…..!!
इंटरनॅटाच्या वापरांत गोंय पयल्या क्रमांकाचेर आसा. कारण अर्थीक नदरेन गोंयकार बरे आसात. पूण, आतां दुसरेय वटेन सोशल मिडिया कितलो वापरचो, ताचे वयलें कितलो वेळ पळोवचें हाचोय विचार केल्यार बरो. कारण ताचो शारिरीक, मानसीक भलायके कडेन थेट संबंद आसा. इंटरनॅटाक गंभीरतायेन घेवया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
