भांगरभूंय | प्रतिनिधी
पणजी : टॉवरा सयत दूरसंचार सेवांच्या मुळाव्या सुविधां खातीर केंद्रान कायदो तयार केल्ल्यान गोंय सरकारान आपलें दूरसंचार धोरण फाटीं घेतलां. गोंयांत टॉवर तशेंच हेर सुविधा उबारपा खातीर आतां केंद्रीय दूरसंचार कायदो लागू जातलो. हे विशींची अधिसुचोवणी जारी जाल्या.
नवो दूरसंचार कायदो, 2023 भारतीय संसदेन चालीक लायलो आनी आनी 1 जानेवारी 2025 ह्या दिसा लागू जालो. आदल्या नेम/ धोरणाचे सुवातेर आनी नव्या नेमांक पाळो दिवप बंदनकारक आसा. दूरसंचार मुळाव्या साधन सुविधांचो विस्तार वेगान करपाक, जोडणी वाडोवपाक आनी प्रक्रियात्मक कळाव उणो करपा खातीर हो कायदो केला. गोंय सरकारान गोवा दूरसंचार धोरण, 2019 तयार केल्लें. हाचे उपरांत 10 एप्रील 2023 ह्या दिसा दुरुस्ती करून तें चालीक लायलें. केंद्रीय कायद्याक लागून हें धोरण आतां काळा भायलें थारता. गोंयांत दूरसंचार सेवां खातीर टॉवराची उबारणी, सुविधा तयार करप हें केंद्रीय कायद्या प्रमाण जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
