भांगरभूंय | प्रतिनिधी
नवी दिल्ली: दिल्ली, मुंबय सारक्या महानगरांनी लेसर आनी यूव्ही लायटीचो चकचक, व्हड संगीता वांगडाच रेव्ह पार्टी घडोवन हाडटात. ह्या पार्ट्यांनी चित्रपट मळावेले कांय जाण ते उच्च वर्गावेल्या तरणाट्यां मेरेन वांटेकार जातात. अशा पार्ट्यांनी थायलंडच्यान येवपी हायड्रोपोनीक गांजाचो वापर वाडला. फाटल्या तीन वर्सांत ह्या गांजाची मागणी खूब वाडल्या.
तपास एजन्सीचे म्हायती प्रमाण आंतरराष्ट्रीय तस्करांचो संघटीत पंगड थायलंडांतल्यान गांजो भारतांत हाडटा. हो माल बिहारांतल्यान दिल्ली, मुंबय, गोंय, पुणे, बेंगळुरू ह्या सारक्या शारांनी व्हरतात.
अशेच तरेन थायलंडांत गांजाचे तस्करी करपाचें प्रकरण उजवाडाक आयल्या. हो गांजो विमानांतल्यान बिहारांतल्या गया आंतरराष्ट्रीय विमानतळार हाडटात. दिल्ली वा मुंबयक खर तपासणी करिनाशिल्ल्यान तस्कर्यांक हें काम सोंपें जाता.
गयाक हाडल्या उपरांत हो गांजो रेल्वे मार्गान मुंबय सारक्या शारांनी धाडटात. दर खेपे थायलंडांतल्यान गांजो भारतांत हाडपा खातीर वेगवेगळ्या लोकांचो उपेग करतात, जाका लागून तपास एजन्सींक ताचो सोद घेवप कठीण जाता. हाचे फाटल्यान आंतरराष्ट्रीय सिंडिकॅटांचें नियोजीत जाळें आसा अशें अधिकार्यांचें मत आसा.
मुंबय, गोंय, दिल्ली, बंगळुरू, चेन्नय, पुणे आनी पंजाब हांगा ह्या गांज्याची व्हड मागणी आसा. रेव्ह पार्टी सोडल्यार क्लबांनी सेगीत वचपी एलिट वर्गांतय ताचो वापर वाडला. तज्ञांच्या मतान थळाव्या गांज्यांत नशेची पातळी सुमार ३ ते ४ टक्के आसता, जाल्यार थायलंडांतल्या हायड्रोपोनिक गांजांत ही पातळी सुमार ३० टक्क्यां मेरेन आसता. हाकाच लागून गांजा उच्च पातळेेवेल्या लोकां मदीं ‘स्टेटस सिम्बॉल’ म्हणून पळयतात हें उजवाडाक आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
