भांगरभूंय | प्रतिनिधी
नवी दिल्ली, खबरां संस्था : गोंयच्यान दिल्लीक वचपी इंडिगोच्या विमानाक आयतारा बारा वरां उशीर जालो. सकाळीं 10.45 चें विमान गोंय विमानतळा वयल्यान रातचें 10.06 वरांचेर उडलें. दाट धुक्याक लागून सकाळीं सुमार इकरा वरांचेर विमान मुंबय विमानतळार देंवलें. ताका लागून तिडकल्ले प्रवासी विमानांतल्यान देंवून विमानाच्या पार्किंगांत बसले. सोशल मिडियाच्या प्लॅटफॉर्म एक्साचेर एक व्हिडिओ व्हायरल जाला. जातूंत प्रवासी विमान पार्किंगांत जमनीर बसून जेवतना दिसतात. १५ सेकंदाच्या ह्या व्हिडिओंत हेर विमानां टेक ऑफ करतना दिसतात. ताका लागून प्रवाशांचे सुरक्षीतताये विशीं प्रस्न निर्माण जाला. इंडिगो एअरलायन्सान हे विशीं चूक मागल्या.
इंडिगो एअरलायन्सान सोमारा सांगलें, दाट धुक्याक लागून विमान गोंयच्यान उसरां उडलां. उपरांत विमान मुंबय विमानतळा वटेन वळयलें. विमानाक शिडी जोडटांच प्रवासी भायर आयले. प्रवाशांनी टर्मिनल बिल्डिंगेंत वचपाक न्हयकार दिलो. उपरांत सीआयएसएफचे जवान आनी विमानतळ कर्मचार्यांनी सगळ्यांत सुरक्षीत सुवातेर पावयले. फुडाराक अशी परिस्थिती निर्माण जावची ना हाची जतनाय घेतलो असो उलो तांणी मारलो.
हो व्हिडिओ व्हायरल जाले उपरांत सोशल मीडियाचेर लोकांनी एअरलायन्सच्या वेवस्थापनाचेर आनी प्रवाशांचे सुरक्षीतताये विशीं प्रस्न केला. खरें म्हळ्यार, प्रवासी बशिल्ल्या जाग्याक ऍप्रन म्हणटात. हांगा विमानाचें पार्कींग आनी सामानाचें लोडींग आनी अनलोडींग जाता. ह्या जाग्यार सुरक्षीततायेचे नदरेन प्रवाशांनी हाजीर रावप योग्य न्हय.
मजगतीं, आयतारा धुक्याक लागून दिल्लीच्यान गोंयां येवपी इंडिगोच्या विमानाक (6E-2175) 13 वरां उशीर जालो. आयतारा सकाळीं 7.40 वरांचेर हें विमान उडपाचें आसलें. ह्या कारणाक लागून तिडकल्ल्या एका प्रवाशान पायलटाचेर मूठ मारिल्ली. ताचे आड विमान कंपनीन एफआयआर दाखल केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
