गोंय दलालगिरी मुक्त करपाक जाय

भांगरभूंय | प्रतिनिधी

रोहन खंवटेः मनोहर विमानतळ थारतलें गेम चेंजर

भांगरभूंय । प्रतिनिधी

म्हापशें: कळंगूटे चलपी सगळ्यो बेकायदो गजाली आनी डान्सबार सासणाचे बंद जातले, हाची तजवीज थळावी पंचायत आनी आमदारान करची. टावट्स आनी बेकायदो दलालगिरीक लागन गोंयचें नांव पेड्डेर जाता. पुर्तुगेजांचे तावडींतल्यान गोंय मुक्त जालां. आतां हे बेकायदो दलालगिरींतल्यान गोंयाक मुक्त करपाचो वेळ आयला, अशें पर्यटन मंत्री रोहन खंवटे हांणी सांगलें.

सोमारा म्हापशेंच्या सरकारी संकुलाच्या वाठारांत गोंय मुक्ती दिसा निमतान झेंडो हुबयले उपरांत मंत्री खंवटे उलयताले. ह्या वेळार अतिरिक्त जिल्होधिकारी पुंडलीक खोर्जुवेंकार, उपजिल्होधिकारी गुरुदास देसाय, मामलेदार दशरथ गांवस, गट विकास अधिकारी शिवप्रसाद अस्नोडकार, पुलीस उपअधिक्षक जिवबा दळवी, निरिक्षक परेश नायक, तुषार लोटलीकार, आदले तशेंच सध्याचे नगरसेवक, सरकारी अधिकारी आनी विद्यार्थी हाजीर आशिल्ले.

आपूण सुरवेक सावनूच कळंगूटेच्या बेकायदो गजालीं आड आवाज काडटालों. पंचायत आनी आमदार आतां  जागे जाल्यात. पंचायतीचे कारवायेक येवकार. हे प्रकार बंद जावपाची खर गरज आसा. हातूंतल्यान गोंयचे प्रतिमेचेर वायट परिणाम जाता, अशें मंत्री खंवटे हांणी सांगलें.

मनोहर आंतरराष्ट्रीय विमानतळ हें गोंया खातीर गेम चेंजर थारतलें. ह्या विमानतळाचो फायदो शेजारचीं राज्यां घेवपाक शकतात. सध्या मालवण, कारवारची उदरगत जाता. थंय वॉटर स्पोर्टस् सुरू जाल्यात. काणकोण आनी केप्यांय पर्यटनाचे नदरेन येवजण्यो चालीक लायतले. सध्या गोंयांत दर्यादेगोच उरूंक नात. ताका लागून सरकारा वतीन दर्यादेगां वयलीं अतिक्रमणां काडटात. लोकांनी दिल्ले सुवातेंतूच वेवसाय करचो, असो मंत्री खंवटे हांणी उलो मारलो.

मजगतीं, ह्या वेळार थळाव्या मामलेदार कार्यालयाचे कर्मचारी दामोदर वेर्लेकार हांणी आयर्न मॅन सर्तींत वांटो घेवन 45 ते 49 वर्सां पिरायेच्या गटांत चवथो नंबर मेळयिल्ले खातीर तांचो अधिकारी वर्गा वतीन मंत्री खंवटे हांचे हस्तुकीं सत्कार केलो. झेंडावंदनाचे कार्यावळी उपरांत पुलीस, विद्यार्थ्यांनी संचलन केलें. शालेय विद्यार्थींनी सांस्कृतीक कार्यावळी सादर केल्यो.

टॅक्सीकारांची दादागिरी सोंसचे नात

वास्को क्रूज बोटींतल्यान आयिल्ल्या विदेशी पर्यटकांक दिल्ले वायट वागणुकेक लागून आमी फुडारांतले उच्च पांवड्या वयले पर्यटक वगडायले. कांय टॅक्सीकारांच्या हे वायट वागणुकेक लागून पर्यटनाचें लुकसाण जालें. ते उच्च दर्जाचे पर्यटक आशिल्ले. तांकां आमी वायट अणभव दिलो. हे मुखार टॅक्सीकारांची दादागिरी सोंसून घेवचे नात. ह्या प्रकरणांतल्या टॅक्सीकारांक अटक जाल्या. तांचो परवानो रद्द करपाची गरज आसा, अशें मंत्री रोहन खंवटे हांणी सांगलें.

टॅक्सी अ‍ॅपाचें नव्या वर्सा लोकार्पण

गोंय टॅक्सी अ‍ॅप सेवेचें स्वरूप तयार आसा. आयटी विभागान अ‍ॅपाची रचना आनी हेर सोपस्कार पुराय केल्यात. नव्या वर्सां हे सेवेचें लोकार्पण करतले. हें संवसारीक तंत्रज्ञान आसा आनी हें तंत्रज्ञान आमी आपणावपाक जाय. तातूंतल्यान निर्माण जावपी महसूल टॅक्सीकारां खातीरूच येवजण्यां वरवीं वापरतले, अशें मंत्री रोहन खंवटे हांणी परतून एकदां सांगलें.