भांगरभूंय | प्रतिनिधी
भांगरभूंय । खेळां मेज
पणजीः अंदूच्या रणजी क्रिकेट सिझनाच्या तिसरे हारीच्या हुमऱ्यार गोंय पंगड आसा. पर्वरी क्रिकेट अकादमीच्या मैदानार रणजी मॅचीच्या चवथ्या दिसा तामिळनाडूक जैता खातीर फकत 76 धांवड्यांची गरज आसा आनी तांचे 9 गडी खेळपाचे आसात.
पयल्या डावांत 32 धांवड्यांनी फाटी पडल्ल्या गोंयचो दुसरो डाव नाबाद 10 वयल्यान 168 धांवड्यांत कोसळ्ळो. चंडीगडची मॅच सोडून चारून मॅचींत गोंयांक तांच्या बँटिंगेन वांगडो दिलो ना. हे मॅचींत फकत सुयश प्रभुदेसाय (79 धांवड्यो) आनी के व्ही सिद्धार्थ (32 धांवड्यो) हाणीच तामिळनाडूच्या बॉलरांक प्रतिकार केलो. दर्शन मिशाळाच्या 12 धांवड्यां बगर बाकीचे बॅट्समन दोन आंकडी धांवड्यो करपाक शकले नात.
गोंयची आयतारा सकाळीं सुरवात बाबत जाली. इनान गडेकार आनी मंथन खुटकाराचो ‘बॅड पॅच’ तसोर रावलो. हे दोगूय 23 धांवड्यात पॅव्हेलियनांत आयले. उपरांत सुय़स आनी सिद्धार्थ हांणी तिसरे विकेटी खातीर 59 धांवड्यांची भागिदारी केली. के व्ही सिदार्थ आवट जाल्या उपरांर दर्शन मिशाळ आनी दीपराज गांवकार रोखडेच आवट जाले. पीचीचेर एकसुरी झुज दिवपी सुयश प्रभुदेसाय 165 स्कोराचेर आवट जालो. उपरांत 3 धांवड्यांत अर्जुन तेंडुलकार, समर दुभाषी, मोहित रेडकार आनी हेरंब परब आवट जाले. तामिळनाडूचो कॅप्टन आर साईकिशोर आनी अजिथ रामान दरेकी 4 जाल्यार प्रदेश रंजन पॉलान 2 विकेटी घेतल्यो.
तिसऱ्या दिसाचो खेळ सोपलो तेन्ना जैता खातीर 137 धांवड्यांचो फाटलाव करतना तामिळनाडून आपल्या दुसऱ्या डावांत 1 आवट 61 धांवड्यो केल्लो. दर्शन मिशाळान नारायणन जगदिशाक 4 धांवड्याचेर बोल्ड केलें उपरांत एस लोकेश्वर (नाबाद 24) आनी प्रदोष रंजन पॉल ( नाबाद 22) हांणी आनीक विकेटी पडपाक दिल्यो नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
