भांगरभूंय | प्रतिनिधी
पणजी ः फेब्रुवारीच्या निमाण्या सप्तका सावन गोंयांत तापमान वाडत आसा. मार्च म्हयन्यांतले पयले धा दीस तापमानांत वाड चालूच आसा. 8 ते 10 मार्च ह्या काळांत गोंयांतले हवामान उश्ण आनी दमट आसतलें असो अदमास हवामान खात्यान उक्तायला. ते प्रमाण ह्या तीन दिसां खातीर यलो अलर्ट जारी केला. हाका लागून मार्च म्हयन्यांतल्या पयल्या धा दिसां खातीर उश्णतायेचो यलो अलर्ट जारी केला.
हवामान खात्यान जाहीर केल्ल्या अदमासा प्रमाण मार्च ते मे ह्या काळांत चडांत चड तापमान सरासरी परस चड आसपाची शक्यताय आसा. फुडले अडेज म्हयने अशीच वा ताचे परस चड उश्णतायेक तोंड दिवचें पडटलें. शेनवारा गोंयांतले चडांत चड तापमान वाडिल्लेंच आशिल्लें. पणजे चडांत चड तापमान 36.6 अंश आनी मुरगांवांत चडांत चड तापमान 36.3 अंश नोंद जालां. फुडले सात दीस गोंयांत चडांत चड तापमान 35 ते 37 अंश सेल्सियस मदीं उरपाची शक्यताय आसा.
गोंय सारक्या दर्यादेगेवेल्या वाठारांनी लेगीत दोन दीस गोंयांतल्या दोन वा चड हवामान केंद्रांच्या नोंदणी प्रमाण, चडांत चड तापमान 4.5 अंशाची वाड जावन ते 37 डिग्री सेल्सियस मेरेन वाडल्यार उश्णताय ल्हारेची घोशणा जाता.
अशी जतनाय घेयात
मजगतीं, राज्यांत वाडत आशिल्ल्या तापमानाक लागून भलायकी खात्यान जतनाय घोवपाचो सल्लो दिलां. ते प्रमाण दनपारां 12 ते 3 वरां मजगतीं घरांतल्यान भायर सरप टाळचें, उदक पियेवचें, भायर सरतना सुती कपडे घालचे, वतात वतना तकली धांपची, अस्वस्थ जाणवल्यार दोतोरा कडेन वचप, सोरो, च्या, कॉफी पियेवप टाळचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
