भांगरभूंय | प्रतिनिधी
पणजीः गोंयांत फुफ्फुसाच्या कॅन्सराचें निदान करपा खातीर एआय तंत्रगिन्यानाचो उपेग सुरू आसा. हाका लागून दुयेंसाची सुरवात वळखून बेगीन उपचार सुरू करप शक्य जालां. एआय तंत्रगिन्यानाचो वापर करपी गोंय देशांतलें पयलें राज्य. फुडाराक हेर दुयेंसां खातीरय अशें तंत्रगिन्यानाचो उपेग करून गोंयाक एआय आदारीत रोग निदानाचे केंद्र करपाचो यत्न करतात अशें भलायकी मंत्री विश्वजीत राणे हांणी सांगलें. मंगळारा पणजेंत जाल्ले पत्रकार परिशदेंत ते उलयताले.
क्यूअर एआय तंत्रज्ञानांतल्यान आतां मेरेन राज्यांत 1 लाखां परस चड छातीच्या एक्सरेंचे विश्लेशण जालां. तातूंतल्या सुमार 1600 जाणांक दुबाव आसा आनी 20 जाणांक फुफ्फुसांचो कॅन्सर जाला. तांचेर उपचारूय सुरू केल्यात. फुफ्फुसाच्या कॅन्सराचें निदान जावपाक वेळ लागता. निदान उसरा जाल्यार उपचारूय उसरां सुरू जातात. हाका लागून मरण येवप्यांचो आंकडो वाडटा. पूण आतां एआय तंत्रगिन्याना वरवीं बेगीन निदान करप शक्य जालां अशें राणे हांणी सांगलें.
तांणी सांगलें, सामान्य प्रक्रियेचे तुळेंत एआय वरवीं निदान करपाक पन्नास टक्क्यां परस उणो वेळ लागता. सध्या ही सुविधा 17 भलायकी केंद्रांनी, हॉस्पिटलांनी आनी गोंय वैजकी म्हाविद्यालयांत उपलब्ध आसा. अशी सुविधा बेगीनूच पुराय राज्यांत सुरू करपाचो विचार चालू आसा. डिसेंबर 2026 मेरेन 2 लाख दुयेंतींचें निदान जातलें. राज्यांतल्या हेर भलायकी केंद्रांनी सगळे छातीच्या एक्स रेंचे एआय स्कॅनिंग करप सक्तीचें करपा खातीर अधिसुचोवणी जारी करतले.
कॅन्सर हॉस्पिटल
राणे हांणी सांगलें, टर्शेरी कॅन्सर हॉस्पिटल पुराय जावपाक आयला आनी 2027 वर्स सोंपचें पयलीं तें सुरू जातलें. हॉस्पिटल टाटा मेमोरियल वांगडा काम करतलें. तातूंत अत्याधुनीक इझ्रायली तंत्रज्ञान यंत्रणेचो वापर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
