भांगरभूंय | प्रतिनिधी
पर्वरी क्रिकेट अकादमीच्या मैदानाचेर येजमान गोंय आनी चंदीगड ह्या पंगडां मदली चार दिसांची रणजी लडत बादाबाद उरली. गोंयान पयल्या डावांत 139 धांवड्यांची आघाडी घेतिल्ली. ह्या म्हत्वाचे आघाडीक लागून गोंयाक तीन गूण फावो जाले, जाल्यार चंदीगडाक एका गुणाचेर समाधान मानचें पडलें.
गोंया खातीर काल निमाण्या दिसा मुखेली दर्शन मिशाळान 110 धांवड्यांनी 5 विकेटी घेतल्यो. ताच्या ह्या प्रदर्शनाक लागून ताची मॅन ऑफ मॅच पुरस्कारा खातीर निवड केली.
चंदीगडाच्या पयल्या डावांत मोहीत रेडकारान 113 धांवड्यांनी 3 आनी अर्जुन तेंडुलकरान आनी लक्ष्य गर्गान दरेकी एक विकेट घेतिल्ली. गोंयची तिसरी मॅच कर्नाटका आड म्हैसुरांत जातली.
ते पयलीं 5 बाद 348 धांवड्यां वयल्यान खेळपाक सुरवात केल्या उपरांत चंदीगडाचो पयलो डाव 479 धांवड्यांचेर सोंपलो. दर्शनान पयलीं राजांगड बावाक वैयक्तीक 90 धांवड्यांचेर बाद करून गोंया खातीर धोक्याची थारपी ही जोडी फोडली. दीपराज गांवकारान ताची कॅच धरली. राजांगडान 236 बॉलांक तोंड दितना 11 चवके आनी एक सको मारलो.
बावा आनी कुणाल महाजन हांणी सवे विकेटी खातीर 203 धांवड्यांची भागिदारी केली. महाजनान 307 बॉलांनी 147 धांवड्यो केल्यो. हातूंत 20 चवक्यांचो आस्पाव आशिल्लो. ते उपरांत आयिल्ल्या मयांक सिद्धू आनी कुणाल महाजन हांकां दर्शन मिशाळान बाद केले आनी गोंयची आघाडी मेळोवपा खातीर दार उक्तें केलें.
मुरुगन आश्विनाची विकेटी मोहीत रेडकारान काडली. जाल्यार संदीप शर्माक दर्शनान बाद केलो आनी चंदीगडाचो डाव सोंपयलो. ते उपरांत दोनूय पंगडांचे मुखेली मॅच बादाबाद दवरपाक तयार जाले, त्या वेळार गोंयान आपल्या दुसऱ्या डावांत बिनबाद 25 धांवड्यो केल्ल्यो.
धांवतकटोः गोंय (पयलो डाव) 7 बाद 618चेर घोशीत, चंदीगड (पयलो डाव) 5 बाद 348 धांवड्यां वयल्यान मुखार 160 ओव्हरींनी सगले बाद 479 धांवड्यो (कुणाल महाजन एलबीडब्ल्यू बॉ. दर्शन मिशाळ 147, राजांगड बावा कॅ. दीपराज गांवकार बॉ. दर्शन मिशाळ 90, मयांक सिद्धू कॅ. दीपराज गांवकार बॉ. दर्शन मिशाळ 4, मुरुगन आश्विन कॅ. दर्शन मिशाळ बॉ. मोहीत रेडकार 27, जगजीत सिंग संधू नाबाद 29, संदीप शर्मा कॅ. इशान गडेकार बॉ. दर्शन मिशाल 2, अतिरिक्त 18.
बॉलींगः अर्जुन तेंडुलकर 26-2-70-1, लक्ष्य गर्ग 16-3-76-1, मोहीत रेडकार 44-9-113-3, विजेश प्रभुदेसाय 23-2-81-0, दर्शन मिशाळ 43-10-110-5, राहुल त्रिपाठी 4-0-16-0, दीपराज गांवकार 4-2-4-0.
गोंय (दुसरो डाव) 9 ओव्हरींनी बिनबाद 25 धांवड्यो (इशान गडेकार नाबाद 17, राहुल त्रिपाठी नाबाद 5, अतिरिक्त 3.
बॉलींगः जगजीद सिंग सिद्धू 5-1-8-0, गौरव पुरी 2-0-8-0, मानन व्होरा 2-0-8-0.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
