भांगरभूंय | प्रतिनिधी
पणजी : अंडरवर्ल्ड डॉन दाऊद इब्राहिम हांच्या घुवळे वखदां नेटवर्कांतलो सामको लागींचो हस्तक दानिश चिकना ऊर्फ दानिश मर्चंट हाका नार्कोटिक्स कंट्रोल ब्युरोन गोंयांत अटक केले उपरांत बरोच बोवाळ जाला. गोंय सध्या घुवळे वखदां, शिंदळकी वेवसाय, हवाला रॅकेट आनी ताका जुळिल्ले गुन्यांव आनी गुन्यांवकारांचें आंतरराष्ट्रीय केंद्र जायत चल्लां काय? हो प्रस्न सध्या मुखार येवपाक लागला.
गुन्यांवकारी मळावेलो डॉन दाऊद इब्राहीमाच्या लागींचो दानिश चिकना हाका गोंयांत अटक केले उपरांत ही बाब अदीक अधोरेखीत जाल्या. दानिश चिकनाक गोंयांत अटक केले उपरांत ताचे सुवातेर कांय नेटवर्क आसा व्हय? हें सोदून काडपाचें आव्हान सध्या गोंयचीं पुलीस यंत्रणां आनी सगल्या तपास यंत्रणां मुखार आसा. वट्ट घुवळे वखदां वेव्हाराचीं पाळां मुळां खणून काडपाची संद तपास यंत्रणांक आसा.
पुलीस रेकॉर्ड आनी हालींच्या जप्तीवेल्यान राज्यांत व्हडा प्रमाणांत ड्रग्जची तस्करी आनी तें घेवप हाका पुश्टी मेळटा. हातूंतच दानिश चिकना हाका गोंयांत अटक केले उपरांत काळें सांवट आनीक वाडत चल्लां. हें ल्हानशेंच राज्य सध्या ट्रान्झिट पॉयंट पसून आंतरराष्ट्रीय ड्रग्ज कार्टेला खातीर वाटपाचें केंद्र जायत चल्लां. ड्रग्ज वेपारांत परदेशी आनी थळाव्यांचो आसपाव आसा. पर्यटक जावन येवपी जायते विदेशी ड्रग्साच्या वेव्हारांत सांपडटात. रशिया, नायजेरिया हांचो तातूंत आसपाव आसा. कांय थळावेय ह्या वेव्हारांत सांपडटात.
हलींच्या काळांत घडिल्ल्यो व्हड घडणुको
अधिकार्यांनी हालींच व्हडा प्रमाणांत ड्रग्स जप्त केल्यात. एप्रील २०२५ वर्सा राज्याच्या इतिहासांतलो सगल्यांत व्हड कोकेनाचो सांठो जप्त केल्लो. ड्रग्स सिंडिकेट प्रकरणांत ह्याच दिसांनी अंडरवर्ल्ड डॉन दाऊद इब्राहिमचो एक मुखेल वांगोडी दानिश चिकना हाका अटक केली. उपरांत तपास यंत्रणां गोंयच्या ड्रग्साचीं पाळां-मुळां खणून काडटली अशी अपेक्षा करतात. कांय पुलीस आनी ड्रग्स माफिया हांचें मदीं बरे संबंद आशिल्ल्यान आरोप, चिंता वाडपी आसात. एका स्वीडिश मॉडेलानूय हे विशीं म्हायती दिल्ली.
हेर गुन्यांवकारी कारवायो
गोंय मानवी तस्करी, बायलांचेर जावपी लैंगीक शोशण हाचे खातीरूय वळखतात. राष्ट्रीय गुन्यांव नोंद ब्युरो (NCRB) प्रमाण, भारतांतल्या नेण्ट्या चलयांचेर बलात्काराचें प्रमाण गोंयांत सगल्यांत चड आसा. राज्यांत व्हडा प्रमाणांत अर्थीक फटींगपणाचीं प्रकरणां नोंद जावपाक लागल्यांत. घुवळे वखदांचे तस्करी वांगडाच मनी लॉंडरिंग वरवीं पयशे दिवपा-घेवपाची प्रकरणांय मुखार येवपाक लागल्यांत.
पुलीस अधिकार्यांच्या मतान गोंयांत संघटीत ड्रग माफिया नात. गोंय हें फकत एक उपभोग केंद्र. मात, दानिश चिकना हाका गोंयांत अटक केले उपरांत हाचे कडेन आनीक खरपणान पळोवन खोलायेन तपास करपाची मागणी आनीक आनीक खर जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
