गोंय कितलें मेरेन सुरक्षीत?

भांगरभूंय | प्रतिनिधी

पहलगामांत जाल्ल्या आतंकवादी हल्ल्याचे घडणुके उपरांत राष्ट्रीय सुरक्षेच्या प्रस्नाचेर केन्नाच नाशिल्ली अशें जरी म्हणूंक येनासलें तरी विशेश गंभीरतायेन चर्चा जायत आसा आनी ती जावंकूच जाय. पहलगामांतल्या आतंकवादी हल्ल्यान सुरक्षच्यो आमच्यो त्रुटी उक्तडार आयल्यात. पहलगाम घडणुकेक म्हयनो जावन गेलो तरी त्या हल्ल्या पसून आमी खूब कितें शिकून घेतलें. राष्ट्रीय सुरक्षेक सर्वोच्च प्राधान्य दिवपाची गजाल आमी सेगीत करीत आसले तरी खंय तरी त्रुटी उरतात आनी तातूंतल्यान पहलगामा सारक्यो दुर्दैवी घडणुको घडटना आमी पळयतात. राष्ट्रीय सुरक्षेचेर आयज पणजेंत ब्रिगेडियर हेमंत महाजन हांचें धन्वंतरी प्रतिश्ठाना वतीन व्याख्यान आयोजीत केलां हेंवूय विशेश आसा. खूबशा जाणांक दिसुये राष्ट्रीय सुरक्षे कडेन आमच्या माणकुल्या गोंयचें कितेंय देणेघेणे आसा काय कितें? तें तर निश्चितूच आसा, पूण आमी वा आमचें सरकार ते विशीं खरेंच गंभीर आसा काय कितें होवूय चर्चेचो मुद्दो थारुये. गोंय सुदैवान आतां मेरेन तशें खूबशें सुरक्षीत आसा हें खरें आसलें तरी हांगा अशें कांयच घडूंक शकचें ना ह्या भ्रमांत आमी जर रावत जाल्यार ताचें घडये आमकां खर मोलूय मेजचें पडत हें लक्षांत घेवनूच सुरक्षेच्या प्रस्नाचेर मात लेगीत हयगय जावची न्हय हे खातीर 24 वरां आनी बाराय म्हयने दोळ्यांत तेल घालून तयार रावप बरें. आमचें गोंय कितले मेरेन सुरक्षीत आसा आनी जंय ताची गंभीरतायेन ‘कोम्बिंग’ ऑपरेशन राबयतात काय कितें ह्या प्रस्नांचेर आयचे घडयेक निदान अपेक्षीत जाप मेळप तशी कठिणूच आसा, आनी म्हणून ह्या विशया कडेन आयज गंभीरतायेन पळोवपाची गरज उप्रासल्या.
आमचें गोंय खऱ्या अर्थान राष्ट्रीय प्रवाहांत आतां एकरूप जावंक लागिल्ल्याचें हालींच जाल्ल्या कांय घडणुकांचो विचार करून म्हणत जाल्यार ती अतिशयोक्तीचें थारचें न्हय. खेटाखेटीची घडणूक गोंयांत केन्ना जाल्ली हें आमी आयकूंक नाशिल्लें. शिरगांवचे जात्रेंत जी घडणूक घडली तातूंत स जाणांक आपलो जीव व्हगडावचो पडलो आनी ती राष्ट्रीय पांवड्या वेली बातमी थारली. विद्यार्थ्यांच्या आत्महत्येच्या घडणुकांनी राजस्थानाच्या कोटा शाराक बदनाम केल्लें आसतना गोंयांतूय एका राष्ट्रीय पांवड्या वेल्या शिक्षण संस्थेच्या हॉस्टेलांत आत्महत्येच्यो अश्यो तीन ते चार घडणुको एका फाटोफाट जाल्ल्यान गोंयचें नांव राष्ट्रीय पांवड्यार वेगळ्या अर्थान झळकलां. आतां तिसरें म्हणल्यार पहलगामांतल्या आतंकवादी हल्ल्याक लागून बशिल्ल्या धक्क्यांतल्यान आमी स्वताक सांवरूकय नाशिल्ले अशा वेळार गोंयांत एक दोन सुवातांनी रस्त्यार मदेकांत पाकिस्तानी बावटे रंगोवपाचो प्रकारूय घडलो. ताका लागून प्रशासन खडबडून जागें जालें. सभापती रमेश तवडकार हांणी लेगीत ह्या प्रकारा आड आवाज काडलो पूण ह्या प्रकारा फाटल्यान नेमक्यो खंयच्यो शक्ती आसात हें अजून स्पश्ट जाल्लें ना, वा तपासांत नेमकें कितें दिसून आयलें हेंवूय कळूंक शकलें ना. आयचे घडयेक अशे तरेचे बारीक ह्या सदरांत मोडत आसलें तरी पाकिस्ताना कडले शिमेर आयज जें वातावरण आसा तें पळयत जाल्यार ताचे कडेन आडनदर करप कितले मेरेन योग्य थारतलें हाचोय विचार जावंक जाय. पाकिस्ताना कडेन जाल्ल्या तीन दिसांच्या झुजा उपरांत अर्थांतच आमच्या गोंयांतूय सुरक्षेचे नदरेन सगल्यो यंत्रणा सज्ज आशिल्ल्याचें एक दोन बसका घेतले उपरांत सांगलें, पूण आमी खरेंच जागरूक आसात? खंयचेय आपत्तीक तोंड दिवपा इतली आमची तयारी आसा? ह्या प्रस्नांक ‘ना’ हीच जाप आसा.
शांत आनी सुसेगाद गोंयांत अशें कांयच जावंक शकचें ना अशा भ्रमांत प्रशासन आनी हेर यंत्रणा आसत जाल्यार तांणी पयलीं हो भ्रम पयस करपाची गरज आसा. आतंकवाद्यांचें लिंक केन्ना केन्ना गोंया कडेनूय जोडिल्ल्याचें तपासांत एक दोन फावटी स्पश्ट जावन लेगीत आमी ताचे कडेन गंभीरतायेन पळोवपाचें नासत जाल्यार आनीक कितें सांगचें. गोंयांतल्यो खूबश्यो सरकारी म्हणात वा भौशीक आस्थापनांतली सद्याची ढिसाळ सुरक्षा वेवस्था आमी जेन्ना पळयतात तेन्ना गोंयांत आतां मेरेन अशें कांयच कशें घडलें ना हे खातीर आमी देवाचे उपकार मानूंक जाय. आतां स्पश्टूच बरोवपाचें आसत जाल्यार गोंयांत सातत्यपूर्ण अशें ‘कोम्बिंग ऑपरेशन’ राबयनात. आमचे कडेन शंबर ते सवायशें किलोमिटराची दर्यादेग आसा. गोंय समृद्ध करपाक अर्थांतूच ह्या सोबीत दर्याचो सांगात मेळिल्लो आसलो तरी आमच्यो दर्यादेगो पुरायपणान सुरक्षीत आसात अशें म्हणूंक येवचें ना. राष्ट्रीय सुरक्षे विशीं ‘कोम्बिंग’ म्हणल्यार कायदो अंमलबजावणी संस्था वा गुप्तचर यंत्रणां वरवीं आयोजीत केल्ल्या पुराय पद्दतशीर तपास वा पाळत दवरपाचे प्रक्रियेचो संदर्भ आसता. हे प्रक्रियेंत संभाव्य सुरक्षेचो धोको, दुबावीत क्रियाकलाप वा ज्या मनशांचेर दुबाव आसा तांकां सोदून काडपा खातीर व्हड प्रमाणांत डेटा, म्हायती वा क्षेत्रांची छाननी आनी विश्लेशण करप समाविश्ट आसता. हे आघाडेर आमच्यो यंत्रणा गोंयांत कितल्यो मेरेन सज्ज आसात हें कळपाचो मार्ग नासलो तरी त्यो सज्ज आसूंक जाय इतलेंच आमकां अपेक्षीत आसा.
गोंयांत आयज भायल्या राज्यांतल्या लोकांनी जें बस्तान मांडलां वा नागरिकांचे जे लोट येत आसात ते आमी आडावंक शकनात हें खरें आसलें तरी ह्या सगल्यांचेर दोळ्यांत तेल घालून खर नदर दवरपी यंत्रणा आमी विकसीत केल्या? होवूय एक मोटो प्रस्न आसा. फक्त भाडेकारांची पडटाळणी केल्ल्यान सगले कितें साध्य जातलें अशा भ्रमांत लेगीत सरकारान रावचें न्हय असोय स्पश्ट संदेश दिवं येता. भाडेकारांची पडटाळणी तर नेमान जावंकूच जाय हाचें दुमत नासलें तरी हेर खूबश्यो गजाली आसात की ताचे कडेन लक्ष दिवपाची गरज आसा. दोना पावला एका उद्देगपतीच्या घराचेर पडिल्ल्या दरोड्यांतले गुन्यांवकार म्हयनो जालो तरी पुलिसांक मेळनात हें कसलें लक्षण. गोंयांतूय कोम्बिंग ऑपरेशन चालू आशिल्ल्याचो दावो सरकारी पांवड्या वेल्यान जायत आशिल्ल्याची शक्यताय आसली तरी ती सातत्यपूर्ण आनी सामकी क्रियाशील आसली जाल्यारूच कितेंय तातूंतल्यान साध्य जावपाची आस्त बाळगूं येतली. गोंय आयज दिसता तितलें सुरक्षीत उरिल्लें ना हें खूबशा निकशांचेर सांगूंक येतलें. ताका लागून हांगा कसलीय वायट घडणूक घडले उपरांतूच जाग येवपा बदला सेगीत सतर्क रावत जाल्यारूच खूब कितें मेळोवं येतलें. कोम्बिंगाच्या नांवा खाला जें कितें चल्लां तें पळयत जाल्यार सरकाराक अजून लेगीत खूब कितें करूंक मेळटलें. राष्ट्रीय सुरक्षे कडेन नवे नवे घात उजवाडा येत आसतना आनी सद्याचे घातूय विकसीत जायत आशिल्ल्यान ताका सामकार वचपा खातीर ‘कोम्बिंग’ ऑपरेशन सेगीत राबोवप हेंच गोंय आनी पर्यायान देशा खातीर फायद्याचें आसा.

वामन प्रभू
9823196359