गोंय काँग्रेसींतल्या बेशिस्त वांगड्यांचेर जातली कारवायः ठाकरे

भांगरभूंय | प्रतिनिधी

अध्यक्ष प्रतिक्षा खलप हांकां प्रदेश काँग्रेस समितीचो तेंकोः पाटकार

भांगरभूंय । प्रतिनिधी

पणजी : गोंय काँग्रेसींतल्या बेशिस्त वांगड्यांचेर खर कारवाय जातली, अशी थेट शिटकावणी गोंय काँग्रेसीचे प्रभारी माणिकराव ठाकरे हांणी दिली. शुक्रारा गोंय महिला काँग्रेस अध्यक्ष प्रतिक्षा खलप हांच्या सोपूत सुवाळ्यांत ते उलयताले. ह्या वेळार अखील भारतीय महिला काँग्रेस अध्यक्ष अलका लांबा, प्रदेशाध्यक्ष अमीत पाटकार, प्रभारी सचीव डॉ. अंजली निंबाळकार, केंद्रीय समितीचे वांगडी गिरीश चोडणकार आनी हेर पदाधिकारी हाजीर आशिल्ले.

गोंय काँग्रेसींतले कांय जाण शिस्त विसरल्यात. अशे लोक प्रसार माध्यमांतल्यान चुकीचो संदेश पातळायतात. हाचे फुडें बेशिस्तपणां चलचीं नात. अशा व्यक्तींचेर खर कारवाय जातली. पक्षाचे कांय निर्णय केंद्रीय पांवड्यार जातात. ह्या निर्णयांक गुपीत विरोध करिनासतना सगळ्यांनी ताका येवकार दिवपाक जाय. कोणाक पक्ष सोडून वचपाचें आसल्यार तें वचपाक शकतात. पक्ष खंयच्याच एका मनशाचेर चलना हें तांणी समजून घेवपाक जाय, अशें ठाकरे हांणी सांगलें.

महिला काँग्रेसीची अध्यक्ष प्रतिक्षा खलप 15 दिसांनी पद सोडटली, अशें कांय जाण चर्चा करतात. ही फकत एक वावडी आनी खलप हांकां प्रदेश काँग्रेस समितीचो पुराय तेंको आसा. काँग्रेसीक फाटीं ओडपाक कांय भितरलेच लोक आसात. अशा लोकांक सोदून काडप गरजेचें आसा. कोणूय पक्षा विशीं अफवा पातळायतात जाल्यार तांचीं नांवां प्रदेश समितीक कळोवचीं, अशें अमीत पाटकार हांणी सांगलें. हाचे आदीं अलका लांबा हांणी गोंयांतल्या बायलांक मुखार येवन अन्याया आड आवाज काडचो असो उलो मारिल्लो. बायलांक राजकी, अर्थीक आनी समाजीक न्याय दिवपा खातीर काँग्रेस पक्ष बांदील आसा, अशें तांणी सांगलें. गोंयांतल्या बायलांक रोजगार उद्देगांत समान संद मेळोवन दिवपाचो आनी बायलांचे उदरगतींतल्यो आडमेळीं पयस करपाचो यत्न करतली, अशें प्रतिक्षा खलप हांणी सांगलें.

आप, तृणमूल मतां फोडटात : निंबाळकार

गोंयांत आप आनी तृणमूल काँग्रेस मतां फोडपाचें काम करता. फाटल्या विधानसभा वेंचणुकेंत लेगीत तांणी तशें केलें. 2027 त गोंयचे लोक फकत काँग्रेसीक तेंको दितले. देखून दोनूय पक्षांनी गोंयांत येवपाची चूक करची न्हय, अशें डॉ. अंजली निंबाळकार हांणी सांगलें.