भांगरभूंय | प्रतिनिधी
अध्यक्ष प्रतिमा खलप हांकां प्रदेश काँग्रेस समितीचो तेंकोः पाटकार
पणजी ः गोंय काँग्रेसींतल्या बेशिस्त वांगड्यांचेर खर कारवाय जातली अशी थेट शिटकावणी गोंय काँग्रेसीचे प्रभारी माणिकराव ठाकरे हांणी दिली. शुक्रारा गोंय महिला काँग्रेस अध्यक्ष प्रतीक्षा खलप हांच्या सोपूत सुवाळ्यांत ते उलयताले. ह्या वेळार अखील भारतीय महिला काँग्रेस अध्यक्ष अलका लांबा, प्रदेशाध्यक्ष अमित पाटकार, प्रभारी सचीव डॉ. अंजली निंबाळकार, केंद्रीय समितीचे वांगडी गिरीश चोडणकार आनी हेर पदाधिकारी हाजीर आशिल्ले.
गोंय काँग्रेसींतले कांय जाण शिस्त विसरल्यात. अशे लोक प्रसार माध्यमांतल्यान चुकीचो संदेश पातळायतात. हाचे फुडें बेशिस्तपणा चलची ना. अशा व्यक्तींचेर खर कारवाय जातली. पक्षाचे कांय निर्णय केंद्रीय पांवड्यार जातात. ह्या निर्णयांक गुपीत विरोध करिनासतना सगळ्यांनी ताका येवकार दिवपाक जाय. कोणाक पक्ष सोडून वचपाचें आसल्यार तें वचपाक शकतात. पक्ष खंयच्याच एका मनशाचेर चलना हें तांणी समजूंन घेवपाक जाय अशें ठाकरे हांणी सांगलें.
महिला काँग्रेसीची अध्यक्ष प्रतिमा खलप १५ दिसांनी पद सोडटली अशें कांय जाण चर्चा करतात. ही फकत एक वावडी आनी खलप हांकां प्रदेश काँग्रेस समितीचो पुराय तेंको आसा. काँग्रेसीक फाटीं ओडपाक कांय भितरलेच लोक आसात. अशा लोकांक सोदून काडप गरजेचें आसा. कोणूय पक्षा विशीं अफवा पातळायतात जाल्यार तांचीं नांवां प्रदेश समितीक कळोवचीं अशें अमित पाटकार हांणी सांगलें.
हाचे आदीं अलका लांबा हांणी गोंयांतल्या बायलांक मुखार येवन अन्याया आड आवाज काडचो असो उलो केल्लो. बायलांक राजकी, अर्थीक आनी समाजीक न्याय दिवपा खातीर काँग्रेस पक्ष कटिबद्ध आसा अशें तांणी सांगलें. गोंयांतल्या बायलांक रोजगार उद्देगांत समान संद मेळोवन दिवपाचो आनी बायलांचे उदरगतींतल्यो आडमेळीं पयस करपाचो यत्न करतली अशें प्रतिक्षा खलप हांणी सांगलें.
आप, तृणमूल मतां फोडटात
डॉ. निंबाळकार हांणी म्हणलें, गोंयांत आप आनी तृणमूल काँग्रेस मतां फोडपाचे काम करता. फाटल्या विधानसभा वेंचणुकेंतय तांणी तशें केलें. 2027 वर्सा गोंयचे लोक फकत काँग्रेसीक तेंको दितले. देखून दोनूय पक्षांनी गोंयांत येवपाची चूक करची न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
