भांगरभूंय | प्रतिनिधी
आदल्या तेंपार गोंयचे कलाकार मराठी संगीत, नाट्य सृश्ट गाजयताले. आतां तो काळ ना. आतां संगीत नाटकां कमी जाल्यांत. जातात, तीं सगलीं आदलींच. हिंदी सिनेमांनीय संगीत वाजोवपाक गोंयच्या कलाकारांचो हात धरपी कोण नाशिल्लो. आचार्य अत्रे हांणी तर लता मंगेशकार हांकां मेळिल्लें यश पळोवन ‘महाराष्ट्राच्या गळ्यान गायता’ अशें बरयिल्लें. तातूंत तथ्य आशिल्लें. कारण बऱ्याच गोंयकार गायकांनी महाराष्ट्रांत नांव जोडिल्लें.
गोंयांक कलेची खण अशें म्हणटात. हांगा विंगड विंगड जात, धर्म पंगडाचे लोक एकजुटीन रावतात. ते विवीध कला हातांत हात घालून फुलयत आयल्यात. हालीं जाल्लो शिगमो पळयात. शिगमो उत्साहाचे उधाण, नवें चैतन्य हाडपी एक उमेदीचो सण. रोमटां मेळ, तालगडी, तरंगां, चित्ररथ हांचो त्रिवेणी संगम. मनोरंजनाचें एक जितें जागतें उदाहरण. उमेदीचे तरंग ल्हार. गोंयात जाय ते कलाकार आसात जे शिगम्याच्या रोमटा मेळान चित्ररथ करपाक भाग घेतात. रातीचे दीस दीसाची आपली नोकरी धंदो सांबाळुन तरेकवार चित्ररथ करतात. खंय सर्ती दवरतात, थंय ते आपलो चित्ररथ घेवन स्वताच्या खर्चान हजर जातात. चित्ररथ करपाक तांका म्हयने लागतात आनी लाखांनी खर्च येता. हे तितलेच खरे व्हड कश्ट मेहनत घेवन ते थारायल्ल्या गांवात वेळेर हजर जातात. कसलीच इनामांची आस न बाळगता ते उमेदीन वांटो घेतात, हें गोंयकाराचें भाग्य अशें समजुया.
मुद्याम सांगिन दिसता की एकाच रातीक दोन जाग्यार चित्ररथ मिरवणुक व्हरप हे तांका परवडना, अशें तांचें मत. एकाच तालुक्यांत एक रात चित्ररथ आसप हें खरेंच बरें. तांकाय खूब त्रास जाता अशें कलाकारांचें म्हणणें. दुसरे म्हळ्यार तांच्या कलेक फावो तसो मान सन्मान मेळप तितलेंच गरजेचें. चित्ररथ करपाक लागिल्लो खर्च थोडो तरी मेळचो अशी तांची अपेक्षा आसता. चित्ररथ इतके सुंदर आकर्शीत आनी तरेतरेचे देखावे जे रामायण महाभारताचेर आधारीत पळोवन हुबेहुब आपुण त्याच युगात वावुरता असो त्या खीणाक आभास जाता. अयोध्येचो राम, लंकापती दशमुखी रावण तांचे झूज पळोवन दोळे दिपून वता. खीणभर ताण तणाव चिंता पयस पळटा.
म्हाका दिसता कलाकाराच्या कलेक वाव मेळप, तांका केल्या कौशल्याची तोखणाय करप वाहवा मेळप बऱ्या कामाची पावती मेळप हें तांचें ध्येय आसता. पयश्याची तांका आस ना, पुण मायबाप सरकारान तांकां फुल थंय पाकळी दिली तर तांच्या कश्टाचे फळ तांकां मेळ्ळें अशें जातलें. शिगम्यांक तांणी केल्या तरेकवार रोमटामेळ, चित्ररथ म्हळ्यार खरे हिंन्दू संस्कृतायेचें दर्शन घडता हातुन दुबाव ना.
शिगमो म्हणजेच एकजुटीचे, प्रतीक, चित्ररथ म्हणजे इतिहासीक पौराणिक घटनाचे एक अनमोल खजानो, अशे म्हाका दिसता. दिसान दीस हे परंपरेन वाड जाता हें खरेंच बरें. हिंदु संस्कृतायेची जनताय तरणाट्या पिळगेच्या हातांतल्यान घडता, तातून उत्तरोत्तर वाड जाता. शिगमो म्हणजे तरणाट्या पिळगेच्या उत्साहाचे उधाण.
सिध्दी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
