भांगरभूंय | प्रतिनिधी
रणजी करंड एलीट गटांतली गोंय आनी कर्नाटक ह्या पंगडां मदली लडत बादाबाद अवस्थेंत सोंपली. मॅच शिवमोगाच्या केएससीए नवुले स्टेडियमाचेर आयोजीत केल्ली.
पयल्या डावांत 154 धांवड्यांनी फाटीं पडिल्ल्या गोंयान फॉलोऑन मेळ्ळ्या उपरांत आपल्या दुसऱ्या डावांत 1 विकेट व्हगडावन 143 धांवड्यो केल्यो.
गोंया खातीर पयल्या डावांत मोहित रेडकारान जाल्यार दुसऱ्या डावांत मंथन खुटकार आनी अभिनव तेजराणान अर्द शेंकडे मारले. पयल्या डावांत आघाडी घेतिल्ल्यान कर्नाटकाक 3 जाल्यार गोंयाक एक गूण फावो जालो. गोंयचे आतां दोन मॅचींतल्यान 8 गूण जाल्यात जाल्यार कर्नाटकाचे 4 गूण जाल्यात.
24 धांवड्यांचेर खेळपी मोहित रेडकारान आपलो अर्द शेंकडो पूर्ण केल्या उपरांत विद्वत कावेरप्पाचे बॉलिंगेचेर विकेटकीपर केएल श्रीजीतच्या हातांत कॅच दिली. त्या वेळार गोंयाक फॉलोऑन टाळपा खातीर 10 धांवड्यांची गरज आशिल्ली. मोहित रेडकारान 77 बॉलांनी 53 धांवड्यो केल्यो. हातूंत तीन चवक्यांचो आनी तीन सक्यांचो आस्पाव आशिल्लो.
समर दुभाषी आना वासुकी कौशिक रोखडेच बाद जाल्ल्यान गोंयाक फॉलोऑन मेळ्ळो. कर्नाटका खातीर विद्वत कावेरप्पान 5, अभिलाष शेट्टीन 3 जाल्यार यशोवर्धन परणतप आनी व्ही वैशाकान दरेकी एक विकेट घेतली.
फॉलोऑन करपी गोंयच्या दुसऱ्या डावाची सुरवात लेगीत निर्शेणी हाडपी जाली. सुयश प्रभुदेसायाक वैशाकान वैयक्तीक 13 धांवड्यांचेर एलबीडब्ल्यू बाद केलो. ते उपरांत मंथन खुटकार नाबाद 55 धांवड्यो केल्यो. ताणें 135 बॉलांक तोंड दितना पांच चवके मारले. अभिनव तेजराणान नाबाद 73 धांवड्यांचें योगदान दिलें. ताणें 126 बॉलांनी णव चवके मारले. दोगांयनी जापसालदारकेन बॅटींग करून मॅच बादाबाद दवरली. तांणी दुसरे विकेटी खातीर 244 बॉलांनी नाबाद 123 धांवड्यांची भागिदारी केली.
गोंय आपली तिसरी मॅच न्यू चंदीगडच्या पीसीए न्यू क्रिकेट स्टेडियमाचेर पंजाबा आड 1 ते 4 नोव्हेंबर ह्या कालावधीत खेळटलो.
धांवतकटोः कर्नाटक, पयलो डाव 371, गोंय (पयलो डाव) 6 बाद 171 धांवड्यां वयल्यान अर्जुन तेंडुलकर कॅ केएल श्रीजीत बॉ विद्वत कावेरप्पा 47, मोहित रेडकार कॅ केएल श्रीजीत बॉ विद्वत कावेरप्पा 53, समर दुभाषी कॅ आर स्मरण 6, वासुकी कौशिक बो व्ही वैशाक 5, विजेश प्रभुदेसाय नाबाद 0, वट्ट 87.2 ओव्हरींनी सगले बाद 217 धांवड्यो.
गोंय (दुसरो डाव) 46 ओव्हरींनी 1 बाद 143 (मंथन खुटकार नाबाद 55, सुयश प्रभुदेसाय एलबीडब्ल्यू बॉ व्ही वैशाक 13, अभिनव तेजराणा नाबाद 73 धांवड्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
