भांगरभूंय | प्रतिनिधी
सुयश प्रभुदेसायान नोंदयिल्ल्या नाबाद शेंकड्या नेटार गोंयान येजमान कर्नाटक पंगडा आड म्हैसुरातल्या एसडीएनआरडब्ल्यू स्टेडियमाचेर खेळयिल्ली चार दिसांची रणजी मॅच बादाबाद दवरली. सुयशाचो अंदूंच्या रणजी हंगामांतलो दुसरो शेंकडो थारलो. सुयशान 289 बॉलांनी नाबाद 143 धांवड्यो केल्यो.हातूंत 11 चवक्यांचो आस्पाव आशिल्लो.
पयल्या डावांत आघाडी घेतिल्ल्यान कर्नाटकाक तीन गूण फावो जाले, जाल्यार बादाबाद मॅचीचो एक गूण गोंयाक फावो जालो. गोंयान तीन मॅचींतल्यान चार गूण मेळयल्यात. हंगामांतली गोंयची तिसरी मॅच तमीळनाडू आड पर्वरी क्रिकेट अकादमीचेर 26 ते 29 जानेवारी मेरेन जातली.
पयल्या डावांत 177 धांवड्यांनी फाटीं आसल्या उपरांत 1 बाद 93 धांवसंख्ये वयल्यान खेळपाक सुरवात करपी गोंयान मॅच दोनूय पंगडांच्या मुखेल्यांनी एकामेकाचे संमतीन बादाबाद दवरपाचो निर्णय घेतलो त्या वेळार आपल्या दुसऱ्या डावांत 6 विकेटी वगडावन 282 धांवड्यो केल्ल्यो. ह्या वेळार गोंय 105 धांवड्यांनी मुखार आशिल्लो.
सुयश आनी के व्ही सिद्धार्थान काल सकाळीं गोंयचो डाव मुखार व्हेलो. पूण, सिद्धार्थाक व्ही वैशाखान 57 धांवड्यांचेर बाद करून पयलो धपको दिलो. ह्या दोगांयनी दुसरे विकेटी खातीर 92 धांवड्यांची भागिदारी केली. ते उपरांत आयिल्ल्या स्नेहल कवठणकार चड वगत खेळपट्टीचेर तग धरपाक जमलो ना. वैयक्तीक 8 धांवड्यांचेर एम व्यंकटेशान ताका बाद केलो. 3 बाद 125 अशी स्थिती आसतना सुयशान दीपराज गांवकाराक वांगडा घेवन गोंयचो गडगडपी डाव सांबाळ्ळो आनी चवथे विकेटी खातीर 246 बॉलांनी 97 धांवड्यांची भागिदारी केली.
दीपराज गांवकारान 134 बॉलांनी 36 धांवड्यांची संयमी खेळी केली. ताणें एक चवको आनी एक सको मारलो. रोहीतकुमारान ते उपरांत गोंयाक दोन धपके दितना पयलीं दीपराज गांवकाराक आनी उपरांत मुखेली दर्शन मिशाळाक बाद केलो. अर्जुन तेंडुलकर लेगीत चड वगत खेळपट्टीचेर तग धरपाक शकलो ना. ताका शुभांग हेगडेन बाद केलो.
कर्नाटका खातीर व्ही वैशाख आनी रोहीतकुमार हाणें दरेकी दोन जाल्यार शुभांग हेगडे आनी एम व्यंकटेश हाणें दरेकी एक विकेट घेतली.
धांवतकटोः गोंय (पयलो डाव) 321 धांवड्यो, कर्नाटक (पयलो डाव) 9 बाद 498 डाव घोशीत, गोंय (दुसरो डाव) 1 बाद 93 वयल्यान 100 ओव्हरींनी 6 बाद 282 धांवड्यो, (सुयश प्रभुदेसाय नाबाद 143, के व्ही सिद्धार्थ कॅ. देवदत्त पडिक्कल बॉ. व्ही वैशाख 57, स्नेहल कवठणकार एलबीडब्ल्यू बॉ. एम व्यंकटेश 8, दीपराज गांवकार कॅ एस शरथ बॉ. रोहीतकुमार 36, दर्शन मिसाळ कॅ. शुभांग हेगडे बॉ. रोहीतकुमार 13, अर्जुन तेंडुलकर कॅ. देवदत्त पडिक्कल बॉ. शुभांग हेगडे 6, समर दुभाषी नाबाद 0, अतिरिक्त 18.
बॉलींगः व्ही कौशीक 14-3-40-0, व्ही वैशाख 13-2-35-2, रोहीतकुमार 19-2-67-2, शुभांग हेगडे 36-5-77-1, एम व्यंकटेश 14-4-29-1, निकीन जोस 4-9-19-0.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
