भांगरभूंय | प्रतिनिधी
पणजी: गोंय उद्देगीक उदरगत महामंडळाक (गोवा-आयडीसी) प्रतिश्ठीत ‘गव्हर्नन्स नाव वेस्ट टेक सिम्पोझियम आनी अवॉर्ड्स २०२५’ मेळ्ळो. गोवा-आयडीसीचे चेअरमन आलेक्स रेजिनाल्ड लॉरेन्स हांकां नामनेचो सीएमडी लीडरशिप अवॉर्ड भेटयलो. बरें नेतृत्व आनी गोंय-आयडीसींतलें प्रशासन आनी तांत्रिक सुधारणांनी म्हत्वाच्या योगदानाची दखल घेवन तांकां हो पुरस्कार भेटयला.
श्री. लॉरेन्स हांच्या नेतृत्वा खाला गोंय-आयडीसीन प्रगतशील उद्देगीक धोरण, वेवसायसुलभते खातीर विवीध मान्यताय प्रक्रियांचें सुलभीकरण करप आनी शाश्वत उद्देगीक उदरगती खातीर अनुकूल वातावरण निर्मिती केल्या. उद्देगीक मळार प्रशासनांत नवे उपक्रम, कार्यक्षमताय, उदरगत आनी उत्कृश्ठताये खातीर महामंडळाच्या समर्पण ह्या गजालींचेर ह्या पुरस्कारां वरवीं उजवाड घाला.
ह्या वेळार आलेक्स रेजिनाल्ड लॉरेन्स हांणी सांगलें, गोंय- आयडीसीन उण्या वेळांत कर्जमुक्त महामंडळ जावन एक तोखणाय करपा सारको टप्पो पुराय केला. ह्या येसाक लागून आमकां गोंयच्या विवीध उद्देगीक वसणुकांनी मुळाव्यो सुविधा हाडपाक १०० कोटी रुपयां परस चड गुंतवणूक करपाक सक्षम केलां. महामंडळान सादर केल्लें ओपन पोर्टल हें अशे तरेचें पयलें डिजिटल भौशीक सेवाउत्पादन म्हणून वळखतात. ह्या पोर्टलाक लागून राज्याच्या उद्देगीक मळार पारदर्शकताय, कार्यक्षमताय आनी वेवसाय करपाची सुलभताय वाडोवन उद्देगीक प्रशासनांत क्रांती जातली. उद्देगीक उदरगत चालीक लावपा खातीर, गुंतवणूक आकर्शीत करपा खातीर आनी गोंयचे अर्थीक परिस्थिती बळीश्ट करपा खातीर आमची वचनबद्धताय कायम आसा, अशें तांणी सांगलें.
आयडीसी कनेक्ट उपक्रमांत २६ कार्यक्रमां वरवीं सरळ उद्देजक, वेवसायिकां कडेन संवाद घडोवन हाडले. खुबश्यो, कागाळी, प्रस्न रोखड्योच सोडयल्यो. हाका लागून उद्देगा कडेन आनीक घटमूट जाले. अर्थीक २०२२ ते २०२४ ह्या काळांत ४ येसस्वी ई-लिलावां वरवीं अर्थीक शाश्वततात साध्य केली. मुखेल उद्देजक संस्थांच्या सहकार्यान आयोजीत ‘इन्व्हेस्ट गोवा २०२४’लागून गोंयांक एक मुखेल गुंतवणूक केंद्र म्हणून ठळक वळख मेळोवन दिली. गोवा-आयडीसीन उद्देगीक रस्त्यां खातीर व्हायट टॉपींग तंत्रज्ञानाचो वापर करून सुलभ आनी चड काळ तिगपी रस्ते करून मुळाव्या सुविधां मदीं सुदारणां हाडली. कोवीड-१९ सवलत येवजण आनी गोवा-आयडीसी एक्झिट सपोर्ट योजना अशा उपक्रमांक लागून ह्या व्हायरसाच्या काळांत उद्देगांक म्हत्वाची मजत केली. तशेंच, गोवा-आयडीसीन बांधकाम मंजुरी, डिजिटल कॉमर्स खातीर ऑनलायन नेटवर्क आनी उद्देगीक वसणूक मुल्यांकन प्रणाली अश्या विवीध म्हत्वाच्या विशयांचेर कार्यशाळा आयोजीत करीत उद्देगीक मळार घटकांक नवे कायदे, धोरण, नेमां विशीं पुरायेन म्हायती दिवन हे प्रक्रिये खातीर सज्ज केलें.
गव्हर्नन्स नाऊ वेस्ट टेक सिम्पोजियम आनी पुरस्कार सुवाळो २०२५ चें आयोजन मुंबय जालें. प्रशासन आनी तंत्रज्ञान मानेस्त हे कार्यावळीक हजर रावले. ह्या वेळार प्रभावी बदल घडोवन हाडपी वेवसायीक नेतृत्व आनी उद्देगीक संस्थांचे म्हत्व सादर केलें. हे माचयेर मेळिल्ल्या पुरस्कारा वरवीं राज्याच्या उद्देगीत उदरगती खातीर प्रेरक म्हणून गोवा- आयडीसीची भुमिका संवसार मुखार ठळक मांडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
