भांगरभूंय | प्रतिनिधी
मडगांव: अन्न आनी संस्कृतीक महोत्सव महोत्सव ३ ते ५ जानेवारी मजगतीं मडगांवां कोस्ता फॅक्टरी, कोस्ता/ दुकळे प्रॉपर्टीज हांगा जातलो. पर्यटन खात्या वतीन आयोजीत, हो तीन दिसांचो महोत्सव सगल्यांक आगळो- वेगळो अणभव दितलो. हातूंत गोंयचे समृद्ध अशे जेवणाचे कलेचें दायज, संस्कृतीक आनी कलात्मक प्रदर्शन आसतलें.
मुख्यमंत्री डॉ. प्रमोद सावंत आनी हेर मानेस्तांचे हाजेरींत ३ जानेवारीक उक्तावण जातलें. ह्या महोत्सवा विशीं पर्यटन मंत्री रोहन खंवटे हांणी सांगलें, गोंय अन्न आनी संस्कृतीक महोत्सव हो गोंयच्या समृद्ध दायजाचो उत्सव. गोंयाक तरातरांचे जिनस, कला आनी संस्कृतीक अणभवांचें संवसारीक ठिकाण म्हणून सादर करपाची ही व्हड संद. संवसारभरच्या लोकांक आमी गोंयच्यो सगळ्यांत उत्कृश्ट गजाली दाखोवपाक बांदील आसात. तीन दीस चलपी हो गोंय अन्न आनी संस्कृतीक महोत्सव परंपरा आनी नावीन्यपूर्णचें मिश्रण आसा. पर्यटकांत ह्या महोत्सवांत खावपाच्या जिन्नसांचो आस्वाद घेवपाची, समृद्ध संस्कृतीक अणभव घेवपाची संद मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
