भांगरभूंय | प्रतिनिधी
एकल्याक अटक, हाचे आदींय कांय जाणांक धरल्यात
नवी दिल्ली : जयपूरच्या जीएसटी गुप्तचर महासंचालनालय विभागान (डीजीजीआय) काल्पनीक वेवसाय (fictitious businesses) चलोवपी आनी ताचें वेवस्थापन करपी संघटनां आड मोहीम चालू केल्या. तिचोच एक वांटो आशिल्ली एक टोळी उध्वस्त केल्या. तिचें दिल्लींत मुखेल कार्यालय आसा. हे टोळयेचे 13 राज्यांनी वेव्हार चलतात, तातूंत गोंयचोय आसपाव आसा.
हे टोळयेन 569 काल्पनीक वेवसाय चलयल्यात आनी ताचे वरवीं वट्ट 1047 कोटी रुपया इतली व्हड प्रमाणांत बोगस आयटीसी (इनपूट टॅक्स क्रेडीट) तयार केल्या. हो वेवसाय चलोवपा खातीर मास्टरमायंड ऋषभ जैन ह्या 30 वर्सां पिरायेच्या दिल्लीचो नागरिकान 10 जाणांक कामाक दवरल्यात. जयपुरांतल्या डीजीजीआयच्या कर्मचाऱ्यांक दिल्लींतल्या ह्या सुत्रधाराचो सोद घेवन ताच्या डेटाचो अभ्यास करून ताका धरपांत येस मेळयलें.
टोळयेची कार्यपद्दत अशी- तिचो जायत्या दलालां कडेन लागींचो संबंद आशिल्लो आनी तांचे वरवीं ती कंपनीं, बँक खातीं, सिम कार्डां विकतीं घेवन दिताली, आरटीजीएस/रोख हस्तांतरण वेवस्थापन करताली. तांचे आनी लावार्थी फर्मा मदीं ही टोळी मध्यस्थी करताली.
गरीब, गरजेवंत आनी दुबळ्या लोकांची वळख वापरून जीएसटीएनचेर वेवसाय नोंद करपी दलाल आनी एजंट आसात. मागीर ते नोंदणीकृत वेवसाय हे टोळयेक विकताले आनी मागीर तांचो वापर करून हे बोगस इन्वाॅयस करताले. ह्या 569 काल्पनीक कंपनीं वरवीं हे टोळयेन 6022 कोटींचे इनवाॅयस करपात्र येणावळींत तर 1047 कोटी आयटीसी अशे 2000 आस्थापनांक धाडल्यात. हीं बोगस आस्थापनां गोंयां सयत राजस्थान, हरयाणा, गुजरात, झारखंड, उत्तर प्रदेश, आसाम, उत्तराखंड, प. बंगाल, महाराष्ट्र अशा 17 राज्यांनी आसात. ही टोळी आनी दलाल वापरताले त्या 73 बँक खात्यांचो आतां मेरेन तपास लागला.
ऋषभ जैनाक 25 जून 2023 दिसा ताब्यांत घेतलो. ताका जयपुरांतल्या अर्थीक गुन्यांव न्यायालयांत हाडला. सध्या तांकां 7 जुलय 2023 मेरेन न्यायालयीन बंदखणींत दवरला. 2022- 2023 ह्या काळांत फटींग आयटीसी आशिल्ल्या 142 प्रकरणांनी वट्ट 1,327 कोटींची नोंद जाल्या. आतां मेरेन 9 जाणांक अटक जाल्या. जयपूर विभागान 2023-24 अर्थीक वर्सांत 1,531 कोटींच्यो 5 बोगस आयटीसीच्यो केशी दाखल केल्यात. 5 जाणांक अटकूय केल्या.
स दिसां पयलीं हेच पद्दतीन 212 काल्पनीक आस्थापना चलोवन 320 कोटींक तोपी घालपी शुभम जिंदाल (24) आनी तरुण जिंदाल (22) ह्या भावांक धरिल्ले. म्हाल सप्लाय करीनासतना तांणी आयटीसी दिल्यात, अशें कळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
