भांगरभूंय | प्रतिनिधी
उपजिल्होधिकारी : शेतजमनीचें रुपांतरण केल्ल्यान 15 लाखांचो दंड
भांगरभूंय । प्रतिनिधी
म्हापशें : हणजुणेंच्या वादग्रस्त गोंया हो नायट क्लब 30 दिसां भितर मातयेभरवण करून सुवात आदले भशेन करची. तशेंच शेतजमीन बेकायदो तरेन बिगरशेती वापरा खातीर रुपांतरीत केल्ले खातीर 15 लाख रुपयांचो दंड दिवपी आदेश बार्देस उपजिल्होधिकारी वर्षा परब हांणी दिला.
6 डिसेंबर 2025 ह्या दिसा हडफडेंचियी बर्च बाय रोमियो लेन ह्या नायट क्लबाक भिरांकूळ उजो लागिल्लो. हे दुर्घटणेंत 25 लोकांक मरण आयिल्लें. ते उपरांत चवकशेंत बर्च क्लब हो गरजेचे परवाने घेनासतना चलयताले, अशें मुखार आयिल्लें. हाची दखल घेवन सरकारान प्रसासकीय यंत्रणांक दर्यादेग वाठारांतल्या नायट क्लब आस्थापनांचेर कारवाय करपाचें निर्देश दिल्लें. तशेंच संयुक्त अंमलबजावणी पंगडाची नेमणूक केल्ली.
ह्या पंगडान दर्यादेग वाठारांतल्या क्लबांची तपासणी केली. त्या वेळार गोंया क्लब हो बेकायदो तरेन उबारिल्ल्याचें उजवाडाक आयिल्लें. हणजूणेंच्या सर्वे नं. 410/1 तली शेतजमनींत हो क्लब उबारिल्लो. ते भायर ह्या क्लबाक अग्नीसुरक्षा परवानो नाशिल्लो. ताका लागून हो क्लब सील केल्लो.
गोंय महसूल कायदो मोडून ह्या क्लबाचें बांदकाम केल्लें. ताका लागून बार्देस मामलेदारान अहवाल सादर करून उपजिल्होधिकाऱ्या कडेन कागाळ दाखल केल्ली. हे कागाळेची दखल घेवन उपजिल्होधिकारी वर्षा परब हांणी गोंया क्लबाचे धनी हिमांशू मल्होत्रा (दिल्ली) हाका 30 दिसां भितर क्लबाचें बांदकाम मातयेभरवण करचें आनी संबंदीत शेतजमीन परतून तिच्या मूळ स्थितींत हाडची, तशेंच शेतजमनीचें रुपांतरण वेवसायीक वापरा खातीर केल्ल्याचे नमूद करून 15 लाखांचो दंड भरपाचो आदेश दिला. हे खातीर 30 दिसांचो वेळ उपजिल्होधिकाऱ्यान मल्होत्रा हाका दिल्या.
हो आदेश 16 डिसेंबर 2025 ह्या दिसा जारी केल्लो. दिल्ले मुजतींत बांदकाम मोडपा सयत जमीन तिचे मूळ स्वरुपांत हाडपाक अपेशी थारल्यार मामलेदारा कडल्यान वयलो आदेश अंमलात हाडटले. हे खातीर जावपी खर्च संबंदीत प्रतिवादी कडल्यान जमीन महसुलाची थकबाकी म्हूण वसूल करतले, अशें ह्या आदेशांत नमूद केलां.
आदेशाक मल्होत्राचें आव्हान
उपजिल्होधिकाऱ्याच्या क्लब विरोधी आदेशाक गोंया क्लबाचे धनी हिमांसू मल्होत्रा हाणें राज्य सरकाराच्या प्रशासकीय लवादा कडेन आव्हान दिलां. बार्देस मामलेदाराक आव्हान याचिकेंत प्रतिवादी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
