भांगरभूंय | प्रतिनिधी
पणजी: केंद्र सरकारान 1 एप्रील 2020 ते 11 ऑगस्ट 2025 मजगतीं एसएएससीआय येवजणे खाला गोंय सरकाराक 3234.75 कोटी रुपयांचें रीण दिलां. गोंयच्या भांडवली गुंतवणुके खातीर केंद्रान हें रीण 50 वर्सांच्या कळंतर ना अशा स्वरुपांत दिलां. केंद्रीय अर्थ राज्यमंत्री पंकज चौधरी हांणी लोकसभेंत दिल्ले लेखी जापेंतल्यान ही म्हायती मेळ्ळ्या. हे विशीं खासदार खगेन मुर्मू हांणी अतारांकीत प्रस्न उपस्थीत केल्लो.
जापेंत दिल्ले म्हायती प्रमाण, विवीध भांडवली गुंतवणूक करपा खातीर केंद्राची येवजण राबोवपा खातीर, मुळाव्यो सुविधा निर्माण करपा खातीर केंद्रा कडल्यान राज्यांच्या भांडवली गुंतवणुके खातीर विशेश निधी (एसएएससीआय) दितात. हातूंत एक देश एक रेशन कार्ड, थळाव्यो स्वराज्य संस्था, उद्देग, भूंय आनी वीज मळार सुदारणा, पीएम गतीशक्ती, पीएम ग्राम सडक, नागरी सुविधांचें डिजिटायझेशन, पोरणीं वाहनां कावलांत काडप, नगर विकास, खाजगीकरण अशा विवीध योवजण्यांचो आस्पाव आशिल्लो.
वयल्या काळांत गोंयाक अर्थीक वर्स 2024-25त सगल्यांत चड 1266.54 कोटी रुपयांचें रीण दिल्लें. 2023-24त 695.20 कोटी, 2022-23त 572.75 कोटी, 2021-22त 111.04 कोटी, 2020-21त 97.66 कोटी रुपयांचें रीण मंजूर करून रक्कम गोंय सरकाराक दिल्ली. चालू आर्थीक वर्सांत गोंयाक 491.56 कोटी रुपयांचें रीण दिल्लें. वयल्या काळांत केंद्रान विवीध राज्यांक मेळून 4.02 लाख कोटी रुपयांचें रीण दिल्ल्याचें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
