भांगरभूंय | प्रतिनिधी
युके भोंवडे विशीं विरेश बोरकार हांची म्हायती
पणजीः युकेंत संसदेंत विशय मांडपा खातीर विरोधी आमदारांक फावो ती संद मेळटा. तशेंच विरोधकांनी सभाघरांत मांडिल्लो खाजगी विधिमंडळ थाराव आनी विधेयकां लेगीत समंत जातात. गोंयान युकेची देख घेवची. तशेंच स्कॉटलँडांत जे किल्ले आसात ते सरकारान राखून दवरल्यात आनी नवो इमारतींक कसलीच परवानगी दिनासतना दायज वाठार तांणी तिगोवन दवरला. पर्यटन खात्यान स्कॉटलँडाची देख घेवची, असो उलो रेव्ह्युलेशनरी गोवन्स पक्षाचे आमदार विरेश बोरकार हांणी मारला.
सांत आंद्रेचे आमदार विरेश बोरकार हालींच १९ दिसांची युके भोंवडी मारून आयले. हे भोंवडे विशीं पत्रकार परिशदेंत म्हायती दितना बोरकार उलयताले.
युकेंत पयली भेट स्विडन शाराक दिवन हांव मूळ गोंयच्या पांच पाच नगरसेवकांक मेळ्ळों. तशेंच ब्रिटीश संसदेक भेट दिवन खासदार बॉब ब्लॅकमन आनी प्रिती पटेल हांचे वांगडा चर्चा केली. तशेंच ब्रिटीश संसदेचे अधिवेशन पळोवपाक संद मेळ्ळी. हे दोनय खासदार विरोधी पक्षाचे फुडारी आसा. मात तांकां विशय वा विधेयक मांडपाक फावो ती संद मेळटा. विरोधात आसून लेगीत तांची तीन विधेयकां संमत जाल्यांत. मात गोंयांत ही स्थिती पळोवपाक मेळना, अशें बोरकार हांणी सांगलें.
तशेंच स्कॉटलँड वचपाचो कसलोच बेत नाशिल्लो. मात लोकांचे मागणेक मान दित स्कॉटलँड दौरो एका दिसा भितर पुराय केलो. थंयसर हांवें एका दायज किल्ल्याक भेट दिली. थयसर किल्ल्या लागसार एकय हॉटेल वा बांधकाम ना. तशेंच तांणी आपलें पोरणें दायज शार तिगोवन दवरलां. थंयसर सगलीं घरां ग्रेनायटची आसात आनी हे सुवातेर नवे इमारतीक बंदी घालून दाय थळ राखून दवरला, अशें बोरकार हांणी सांगलें.
मात गोंयांत उरफाटे चल्लां. बांधकाम प्रकल्पाक लागून गोंयचीं दायज थळां आतां नश्ट जावपाक लागल्यांत. स्कॉटलँड हें संवसारांतल्या अवल्ल पर्यटन थळा ंमदीं येता देखून पर्यटन खात्यान स्कॉटलँडाची देख गोंय दायज थळ म्हण फुडें व्हरचे, असो उलो बोरकार हांणी मारला.
तशेंच स्विडन शारांत पुलीस कंट्रोल रुम, मुळावी शाळेंत शिकपी गोंयच्या भुरग्यांक तशेंच सरकारी हॉस्पिटलांत गोंयच्या पेशंटांची भेट घेवन तांचो अणभव आयकलो. तशेच सेंट्रल लायब्ररीच्या गोंय विभागाक भेट दिली. कोयर प्रक्रीया प्रकल्पाचो दौरो केलो. हे सारकिल्ली आधुनिक यंत्रणां गोंयांत सुरू करच्यो, असो सल्लो बोरकार हांणी मारलो.
तशेंच गोंयकार जे कंपनीनी काम करतात तांचे वांगडा भासाभास करून तांचे काम करपाची वरा आनी पगारा विशीं चर्चा केली. तशेच गोंयकारां वांगडा परस्पर संवाद करून ओसीआय कार्ड आनी दोट्टी नागरीकत्व हे विशयाचेर तांचेनी चर्चा केली. तशेच युकेच्या १०० वर्सा पयलीच्या रेल्वे आनी मेट्रोत भोंवडी घेवन येरादारीचो अणभव घेतलो. ह्यो सुविधा गोंयांत शक्य आसात, अशें बोरकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
