भांगरभूंय | प्रतिनिधी
समीप नार्वेकार
भांगरभूंयः गोंयांत स्मार्ट फोन वापरपी लोकांचो आंकडो 28.45 लाखांचेर पावला. सुमार 15 लाख लोक संख्या आशिल्या गोंयांत दरेका गोंयकारा फाटल्यान दोन मोबायल अशी सरासरी आसा. गोंयांत इंटरनेट वापरतल्यांचो आंकडो 20 लाखां परस चड आसा अशी म्हायती केंद्रीय म्हायती आनी तंत्रगिन्यान मंत्रालयाच्या अहवालांतल्या मेळ्ळ्या.
2011च्या जनगणने प्रमाण गोंयची लोक संख्या 15.78 लाख आसा. 2021 वर्सा नवी जनगणाना जावपाची आशिल्ली, मात ती 2042 मेपेन फुडें धुकल्ल्या. मजगतींच्या तेपार गोंयचे लोक संख्येन कांय हजारांची भर पडपाक शकता. पूण 15 लाख लोकां कडेन वट्ट 28 लाखां परस चड मोबायल आसप ही एक अजापाची गजाल म्हणू येता. मार्च 2014 पयलीं 15 लाख गोंयकारां कडेन फकत 1 लाख 71 हजार मोबायल आशिल्ले. णव वर्सांनी तांचो आंकडो वाडून डिसेंबर 2023 मेरेन तांचो आंकडो 28 लाख 45 हजारांचेर पावला अशें मंत्रालयाची आंकडेवारी सांगता.
स्मार्ट मोबायलांत इंटरनेटाची सुविधा आसता. तरीय फायबर इंटरनेट वापरपी लोकांचो आंकडो डिसेंबर 2023 मेरेन 20 लाख 94 हजारांचेर पावला. हांतूंत वैयक्तीक आनी ऑफीस कामाचो आसपाव आसा. 2014 पयलीं हो आंकडो फकत 2. लाख 31 हजार आशिल्लो. गोंयांत सप्टेबर 2023 मेरेन 5,463 किलोमीटरां मेरेन इंटरनेट सेवा दिवपी फायबर
ओप्टीक केबल्स घातल्यात अशें मंत्रालयाचे आंकडेवारींत नमूद केलां.
गोंय सरकाराचें स्वताचें गोंय ब्रोडबॅन्ड नेटवर्क आसा आनी तिचे वरवीं राज्यांतल्या सगल्या ग्रामपंचायतींत ब्रॉडबेंड इंटरनेट सेवा दिल्या. केंद्र सरकारान भारत फायबर ही इंटरनेट सेवेची संकल्पना चालीक लायल्या़ आनी तातूंत गोंयचो आसपाव आसा.देशांतल्या 55 शारांनी 4 जी इंटरनेट सेवा मेळची म्हणून सरकारान 41.331 कोटी रुपयांच्या खर्चाक मुंजरी दिल्या. तातूंत गोंयच्या गांवगिऱ्या वाठाराचोय आसपाव आसा अशें मंत्रालया वतीन सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
