भांगरभूंय | प्रतिनिधी
पणजी: गोंयांत सोमारा केपें आनी पर्वरी जाल्ल्या दोन भिरांकूळ अपघातांत दोगांक मरण आयलें, जाल्यार सांतइनेज वाठारांत ‘हिट अॅण्ड रन’ अपघातांत जखमी जाल्ल्या तरणाट्याक मंगळारा सकाळीं उपचारा मजगतीं, मरण आयलें. हे फाटभुंयेर राज्यांतल्या अपघाती मरणांचो नियाळ घेतलो तेन्ना, राज्यांत 1 जानेवारी ते 21 ऑक्टोबर 2024 ह्या 295 दिसांच्या काळांत 2,098 अपघातांची नोंद जाल्या. जाल्यार 214 भिरांकूळ अपघातांत 226 जाणांक मरण आयिल्ल्याची धपको दिवपी म्हायती मुखार आयल्या.
ही अांकडेवारी पळयल्यार दिसाक 7 अपघात घडटात. जाल्यार सरासरी 31 वरांत एकल्याक अपघातांत मरण येता. 2023 चे तुळेंत 2024 त 187 (8.18) टक्के अपघात उणें जाल्ले आसून अपघाती मरण येवपाचो अांकडोय 5 (2.16) मरणांनी उणो जाला.
सोमार 21 वेर सकाळीं तीन बिल्डींग, पर्वरी दुचाकीक ट्रकाचो धपको बसून ताचे पोंदा चिड्डील्यान विजया मुरगांवकार (45, सिरीन -चिंबल) हे बायलेक मरण आयलें. जाल्यार दुचाकी चालक हिरालाल मुरगांवकार (55) हे किरकोळ जखमी जाले. तशेंच सोमारा रातीं उसरां केप्यां स्क्वाेडा मोटारीन तीन दुचाकींक धपको दिलो. हातूंत अब्दुल कादर बादशाह हाका मरण जाग्यारूच मरण आयले जाल्यार सुफियान शेख हे गंभीर जखमी जाल्ले.
सोमारा रातीं सांतइनेज वाठारांत दुकळे हेवन इमारती लागसार दोन दुचाकींत जाल्ल्या अपघातांत अजय राजभर (24, ताळगांव, मूळ उत्तर प्रदेश) हो तरणाटो गंभीर जखमी जाल्लो. ताचेर उपचार सुरू आसतना गोमॅकाँत मंगळारा ताका मरण आयलें.
अपघात आडावपा खातीर जायते उपाय येवजण्यो केल्यात, तरी लेगीत अपघाती मरण आडावप शक्य जायना, अशें दिसून येता. राज्यांत पुलिसां कडल्यान नागरीक तशेंच विद्यार्थ्यां मदीं येरादारी नेमां विशीं जागृताय करतात. तशेंच येरादारी नेमांचे उल्लंघन करप्यांचेर कारवाय करतात, अशें आसतना बाबत रस्ते आनी रस्त्यांचे चुकीच्या पद्दतीन बांदकाम, वाहनचालकांची घाळपणां, येरादारी नेमांचे उल्लंघन अशा जायत्या कारणांक लागून अजुनूय अपघात घडटात, अशें दिसून येता.
राज्यांत 1 जानेवारी ते 2024 ह्या 295 दिसांच्या काळांत 2,098 अपघात जाले. हातूंत 214 भिरांकूळ अपघतांची नोंद जाल्या. वयल्या काळांत वट्ट 226 जाणांक अपघातांत मरण आयलें. तशेंच 157 अपघातांनी 211 जाणांक गंभीर दुखापत जाली. राज्यभर जाल्ल्या 388 किरकोळ अपघातांत 610 जाणांक किरकोळ दुखापती जाल्यात. तशेंच 1,338 अपघातांत वाहनांचें व्हड लुकसाण जालां.
वयल्या काळांत 2023 त राज्यांत 2,285 अपघात जाल्ले. तातूंतल्या 214 भिरांकूळ अपघातांत 231 जाणांक मरण आयिल्लें. त्या वेळार 179 अपघातांत 270 जाणांक गंभीर, जाल्यार 406 अपघातांत 670 जाणांक किरकोळ दुखापती जाल्लो. ते भायर 1,487 वाहनांचें व्हड लुकसाण जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
