भांगरभूंय | प्रतिनिधी
-मुख्यमंत्रीः कार्यकर्त्यांनी जातीभेदाच्यो वण्टी हुपून एससींक पक्षकार्यांत आस्पावन घेवचे
पणजीः हेर राज्या प्रमाण गोंयातूय अर्बन नक्षलवादी कार्यरत आसात. तांणी राज्यांतल्या अनुसूचीत जातीतल्या (एससी) लोकांचो गैरफायदो घेवचो न्हय, हे खातीर जाती-धर्म कुशीक दवरून तांकां घरा आपयात, तुमीय तांच्या घरा वचात. तांकां भाजप कार्यांत वांटेकार करून घेयात, असो उलो मुख्यमंत्री डॉ. प्रमोद सावंत हांणी केला.
शेनवारा पणजे मिनेझीस ब्रागांझा सभाघरांत आयोजीत भाजपाच्या विवीध मोर्चांच्या पदाधिकाऱ्यांचे बसकेंत ते उलयताले. ह्या वेळार तांचे वांगडा राज्यसभा खासदार तशेंच भाजप प्रदेशाध्यक्ष सदानंद शेट तानावडे, उपसभापती जोशुअा डिसोझा, आदले आमदार दामू नायक, दयानंद सोपटे आदीं मानेस्त उपस्थीत आशिल्ले.
गोंयांतल्या दरेक पंचायतींत एससी समाजाचो वाडो आसा, पूण ह्या वाड्या वयले लोक अजुनूय उपेक्षितूच आसात. प्रधानमंत्री नरेंद्र मोदी हांणी फाटल्या 10 वर्सांच्या काळांत ह्या समाजाचे उदरगती खातीर जायत्यो येवजण्यो राबयल्यात. विवीध मार्गांनी तांची उदरगत केल्या. हे तांकां पटोवन दिवपा खातीर भाजपा कार्यकर्त्यांनी तांचे मेरेन पावप गरजेचें. तांकां पक्षाच्या कार्यांत वांटेकार करून घेवप तितलेच म्हत्वाचें. हेर राज्या प्रमाण गोंयातूय अर्बन नक्षलवादी सक्रीय आसात. ते गोंयांतल्या एससी समाजाच्या लोकांचो गैरफायदो घेवपाक शकतात. ताका लागून भाजपा कार्यकर्त्यांनी जातीभेदाच्यो वण्टी हुपून तांचे मेरेन पावप गरजेचेें आसा, अशें मुख्यमंत्री डॉ. सावंत हांणी नमूद केले.
प्रधानमंत्री नरेंद्र मोदी हांणी सगल्याच जाती-धर्मांतल्या लोकां खातीर काम केलां. मनीस उदरगत हेच ध्येय दवरून विवीध येवजण्यांच्या माध्यमांतल्यान तळागाळांतल्या लोकांची उदरगत केल्या. राज्य सरकारानूय मुळाव्या साधनसुविधां सयत मनीस उदरगतीक प्राधान्य दिलां. ताका लागून भाजपाच्या सगल्या कार्यकर्त्यांनी तांच्या घराघरां मेरेन वचून केंद्र आनी राज्य सरकाराच्या येवजण्यांचो तशेंच प्रधानमंत्री मोदी हांणी केल्ल्या कामांचो प्रचार आनी प्रसार करप गरजेचें, अशें मुख्यमंत्र्यांनी म्हणलें.
जातीभेदाच्यो वण्टी हुपून प्रधानमंत्री मोदी हांणी नारीशक्ती, युवाशक्ती, किसानशक्ती आनी गरीब कल्याण ह्या चार खांब्याचेर लक्ष केंद्रींत करून 2047 मेरेन देशाक विकसीत करपाचो संकल्प केला. मोदींचो हो संकल्प सत्यांत हाडपा खातीर सगल्यानीच प्रामाणीकपणान काम करप गरजेचें, अशेंय मुख्यमंत्री डॉ. प्रमोद सावंत हांणी स्पश्ट केले.
22 जानेवारी दिसा प्रधानमंत्री नरेंद्र मोदी हांचे हस्तुकीं अयोध्येंतल्या राम मंदिराचें उक्तावण जातले. अयोध्येंत राम मंदिराची उबारणी जावची, हे दरेक भारतीयाचें सपन आशिल्लें. ते प्रधानमंत्री मोदी हांणी सत्यांत हाडलां. ताका लागून राम मंदिराचो उक्तावण सुवाळो गोंयकारांनीय दिवाळी परबे प्रमाण मनोवचो, असो उलो सदानंद शेट तानावडे हांणी केला.
दक्षीण गोंय 60 हजारांच्या मताधिक्क्यान जिखतले
गोंयांतल्यो लोकसभेच्याे दोनूय सुवातो उत्तर गोंय आनी दक्षीण गोंय ह्या वेळार भाजपच जिखतलो. दक्षीण गोंयची सुवात 2014 त भाजपान 30 हजारांच्या मताधिक्क्यान जिखिल्ली. ह्या वेळार मात ही सुवात आमी 60 हजारांच्या मताधिक्क्यान जिखतले, असो निश्चेव मुख्यमंत्री डॉ. प्रमोद सावंत हांणी केला. लोकसभा वेंचणुकेंत पुराय सक्रीय जावन भाजप कार्यकर्त्यांनी घरांघरां मेरेन पावपाक जाय, अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
