भांगरभूंय | प्रतिनिधी
गोवा स्ट्रीट रेसिंग रेसचे आयोजनपणजीः गोंयांत 31 ऑक्टोबर ते 2 नोव्हेंबर मेरेन मुरगांवां फॉर्मूला 4 रेसिंग सर्त घडोवन हाडल्या. हे खातीर सरकार सुमार 52 कोटी रुपया खर्च करतलें. हे सर्ती वरवीत गोंयाक आंतरराष्ट्रीय खेळां केंद्र करपाचो यत्न आसा अशें मुख्यमंत्री डॉ. प्रमोद सावंत हांणी सांगलें. बुधवारा पणजेंत आयोजीत केल्ले कार्यावळींत ते उलयताले. ह्या वेळार आमदार संकल्प आमोणकार, म्हायती आनी प्रसारण सचीव एसएस गिल, ईएसजीचे सीईओ अश्विन चंद्रू, अखिलेश रेड्डी आनी हेर मानेस्त हाजीर आशिल्ले.
गोंयची वळख आतां फकत सन, रेंव आनी दर्या ना अशें मुख्यमंत्र्यान सांगलें. पर्यटनाचे नदरेन राज्यांतल्या खेळां मळाक सरकार उर्बा दिता. हाचे पयलीं राज्यांत राश्ट्रीय आनी आंतरराश्ट्रीय खेळां सर्तींचें आयोजन केल्लें आसा. फॉर्मूला 4 रेसिंग सर्तींतल्यान गोंयाक खेळां मळार आंतरराष्ट्रीय मान्यताय मेळटली. संवसारभरांतले प्रेक्षक सर्ती खातीर येतले म्हणून थळाव्या हॉटेलांक, टॅक्सी ड्रायव्हरांक आनी हेर वेवसायीकांक फायदो जातलो. तशेंच थळाव्या लोकांक प्रत्यक्ष वा अप्रत्यक्ष रितीन रोजगाराची संद मेळटली.
तांणी सांगलें, सर्ती खातीर मुरगांवां 3.2 किमी. हो ट्रॅक दर्यालागच्यान वता. दक्षीण आशियांतलो होच ह्या प्रकाराचो मेकमेव ट्रॅक आसा. सर्तीच्या वेळार येरादारींत कसलोच आडखळय येवची न्हय हाची जतनाय घेतले. फुडाराकय हो ट्रॅक वापरतले. ही सर्त घडोवन हाडपा खातीर राज्य सरकार आनी आरपीपीएल हांचे मदीं समन्वय पत्राचेर सय केल्या. तीन दिसांच्या सर्ती खातीर 127 कोटी रुपया खर्च येवपाची शक्यताय आसा. हातूंतले 70 टक्के खर्च कंपनी करतली. मुळाव्या सुविधां खातीर गोंय सरकार 52 कोटी रुपया दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
