भांगरभूंय | प्रतिनिधी
पर्वरीच्या क्रिकेट अकादमी मैदानाचेर चालू आशिल्ले रणजी एलीट सी गटांतले मॅचींत येजमान गोंयान राजस्थान पंगडा आड पयल्या डावांत म्हत्वाची 91 धांवड्यांची आघाडी घेवन वट्ट तीन गूण मेळयले.
गोंयान 9 बाद 547 धांवड्यो करून आपलो पयलो डाव घोशीत केल्लो, जाल्यार ताका प्रत्त्युत्तर दितना राजस्थानाक 456 धांवड्यो करप शक्य जाल्यो. गोंया वतीन दोट्टी शेंकडो मारपी सुयश प्रभुदेसायाची मॅन ऑफ द मॅच पुरस्कारा खातीर निवड जाली.
मजगतीं, राजस्थानाच्या निमाण्या दोन विकेटींनी 158 धांवड्यांची भर घालून गोंयच्या बॉलरांक पयल्या दोन सत्रांनी बरोच घाम काडलो. अश्टतासांचो खेळगडो आराफात खानान 130 बॉलांनी नाबाद 80 धांवड्यांची खेळी केली. हातूंत णव चवक्यांचो आनी दोन सक्यांचो आस्पाव आशिल्लो. ताणें मानव सुतारा वांगडा आनी उपरांत अनिकेत चौधरी वांगडा वळेरेन 60 आनी 98 धांवड्यांची भागिदारी केली.
मानव सुतारान 95 बॉलांनी आठ चवके आनी एका सक्याचे मजतीन 48 धांवड्यो केल्यो. जाल्यार अनिकेतान 63 बॉलांनी 38 धांवड्यो केल्यो. हातूंत दोन चवक्यांचो आनी दोन सक्यांचो आस्पाव आशिल्लो. ह्या भागिदाऱ्यांक लागून राजस्थानान फॉलोऑन वाटायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
