गोंयाक बुधवार थारलो ‘घात’वार : पांच जाणांक अपघातांत मरण
भांगरभूंय | प्रतिनिधी
पणजी : बुधवारा संवसारभर नातलां उमेदीन मनयलीं. ह्या उमेदीच्या दिसा राज्यांत जायत्यो दुखेस्त घडणुकोय घडल्यो. गोंयांत काल विवीध सुवातांचेर पांच अपघात घडले आनी ह्या पांच अपघातांनी पांच जाणांक मरण आयलें.
केपें- पाड्ड्यां एकल्याक मरण
केपें- पाड्ड्यां ओव्हरटेक करपाचो यत्न करतना एके दुचाकीचो धपको दुसरे दुचाकीक बसलो. काल सकाळीं सुमार ८.३० वरांचेर घडिल्ल्या ह्या अपघातांत शिरवई- केपेंचो रोशन मुजावर (४१) हाका मरण आयलें. मेळिल्ले म्हायती प्रमाण, मुजावर हे आपली जीए- ०९- ७९८० हे दुचाकीवेल्यान वतना, फाटल्यान येवपी सरफराज मोहम्मद हांणी जीए-एपी-११६५ हे दुचाकीन धपको दिलो. सरफराज ओव्हरटेक करपाचो यत्न करतना हो अपघात घडलो. हातूंत रोशन मुजावर हाका आपलो जीव वगडावचो पडलो. केपें पुलिसांनी अपघाताचो पंचनामो केलो.
तळयेंत बुडून एकल्याक मरण
सावयवेरेंच्या अनंत देवळाचे तळयेंत आपल्या दोगां भुरग्यांक पेंवपाक शिकोवपी तुळशीदास दत्ता पालकार (४२, सावयवेरें) हाका बुडून मरण आयलें. पेंवपाक शिकयतना ताका काळजाचो आताक आयिल्ल्याचो अदमास उक्तायला. पोस्टमार्टम अहवाल आयले उपरांत मरणाचें कारण स्पश्ट जातलें.
म्हाड्डोळ पुलिसांनी दिल्ले म्हायती प्रमाण, बुधवारा दनपरां तुळशीदास आपल्या ९ आनी ८ वर्सां पिरायेच्या भुरग्यांक तळयेंत पेवपाक शिकयतालो. उपरांत दोगूय भुरगे तळयेंतल्यान भायर आयले. मात आपलो बापूय अचकीत तळयेंत बुडिल्ल्याचें पळोवन त्या दोगांयनी बोवाळ मारून लागसारच्या लोकांक आपयले. उदकांतल्यान भायर काडले उपरांत गंभीर अवस्थेंत बेतकी भलायकी केंद्रात व्हेलो. दोतोरांनी तपासणी केले उपरांत ताका मरण आयिल्ल्याचें सांगलें. थळाव्या लोकांनी तुळशीदास हाका काळजाचो आताक येवन मरण आयिल्ल्याचो अदमास उक्तायला. म्हाड्डोळ पुलीस स्टेशनाचे निरीक्षक योगेश सावंत हांच्या मार्गदर्शना खाला घडणुकेचो पंचनामो केलो.
कळंगूटे बोट उमथली: एकल्याक मरण
कळंगूटे पर्यटकांक दर्यांत भोंवडेर व्हरपीबोट उमथली. हे घडणुकेंत सुर्यकांत पोफळकार (४५, रा. खेड रत्नागिरी) हाका मरण आयलें. जाल्यार ताच्या पांच वर्सांच्या पुता सयत पांच जाणांची भलायकी हुस्को करपा सारकी आसा. गोंय वैजकी हॉस्पिटलांत तांचेर उपचार सुरू आसात. खेड- महाराष्ट्रांतल्या पोफळकर, चिंचविलकर आनी हंबीर ह्या कुटुंबांतले १३ जाण गोंयांत नातलांचे सुटये निमतान आयिल्ले.
मेळिल्ले म्हायती प्रमाण, ही घडणूक २५ डिसेंबराक सकाळीं सुमार ११ वरांचेर घडली. १३ पर्यटकांक घेवन जॉन वॉटर स्पोर्टस् ही बोट पर्यटकांक भोंवडेर व्हरपाक दर्यांत देंवली. सुमार शंभर मिटराच्या अंतराचेर हे बोटीचें इंजिन रेंवेंत रोमलें आनी बंद पडलें. तेन्ना दर्याचें ल्हार नेटान बशिल्ल्यान बोट उदकांत उमथली. ताचे पयलीं बोटीन एक भोंवडी मारिल्ली. दुसरे भोंवडेर आयिल्ले कडेन ही घडणूक घडली.
बोट उमथल्ल्यान सगळे प्रवासी उदकांत पडले. ह्या अपघातांत सुर्यकांत हांचें तोंड बोटीक आदळिल्ल्यान रगत बरेंच वचून ताका मरण आयलें. सगळ्या प्रवाशांनी लायफ जॅकेट घाल्लें. हो अपघात घडटांत दर्यादेगेर आशिल्ल्या बोटीं सयत दर्यादेग आनी पर्यटक पुलीस थंय पावले. तांणी बुडपी पर्यटकांक उदका भायर काडले. तशेंच ऍम्बुलन्सींतल्या कर्मचार्यांनी पर्यटकांक सीपीआर दिलें आनी सगल्यांक कांदोळेच्या मुळाव्या केंद्रांत व्हेले. थंय दोतोरांनी सुर्यकांत पोफळकर हाका मरण आयिल्ल्याचें सांगलें.
भारती हंबीर (२९), विहान चिंचविलकर (४), शौर्य पोफळकर (५), जयंत चिंचविलकर (६५) आनी जयंती चिंचविलकर (५०) ह्या पांच जाणांचेर गोमेकॉंत सध्या उपचार सुरू आसात. सारिका (३५), संचिता (१४), रजनी (२६), सुरज (२९) विशांत (५) निवृत्ती (४०) आनी रेश्मा (३२) हांकां डिस्चार्ज दिला.
कासाक गेल्ल्या एकल्याक मरण
सत्तरी म्हालांतल्या पाटवळच्या रानांत दुकराच्या कासाक (शिकार) गेल्ल्या एकल्याक बंदुकेची गुळी लागिल्ल्यान मरण आयलें. समद खान (नानूस- सत्तरी )अशें ताचें नांव.
हे विशीं चड म्हायती प्रमाण, तीग जाण रानांत कास करपाक गेल्ले. समद खान हाका बंदुकेची गुळी लागून मरण आयलें. हे घडणुकेची म्हायती मेळटांच पुलीस घडणुके सुवातेर आयले आनी तांणी समद खान हाचे सयत आशिल्ल्या हेर दोगांक ताब्यांत घेतले. समद खान हाका गुळी नेमकी कशी लागलो हाचो सोद घेवपा खातीर हे सुवातेर फॉरेन्सीक पंगडाकडेय उलोवप जालें.
मजगतीं, वाळपय पुलीस स्टेशनांत समद खान हाच्या सोयर्यांनी आनी इश्टांनी गर्दी केल्ली. समद हाची कूड गोमेकॉंत पोस्टमार्टमा खातीर धाडल्या. हे विशीं पुलीस फुडलो तपास करतात.
भाटी-गोवा वेल्हा एकल्याक मरण
भाटी- गोवा वेल्हा गाडयेचो एके राखणे वणटीक धपको बशिल्ल्यान फ्रान्सीस ब्रागांझा (४३, फोर्गोटेवाडो, गोवा वेल्हा) ह्या गाडी ड्रायव्हराक मरण आयलें. जाल्यार गाडयेंत आशिल्ले दामोदर आर्लेकार (गोवा वेल्हा) जखमी जाले.
हो अपघात बुधवार २५ डिसेंबराक फांतोडेर सुमार ४ वरांचेर घडलो. भाटी फ्रान्सीस आनी दामोदर हे नातलां निमतान पार्टेक वांटेकार जाल्ले. पार्टेच्यान ते सकाळीं घरा परतताले. वाटेर फ्रान्सीस हाचें गाडयेवेलें नियंत्रण सुटलें आनी रस्त्या कुशीचे राखणे वणटीक धपको बसलो. ह्या अपघातांत फ्रान्सीस गंभीर जखमी जाले. तांकां आनी दामोदर हांकां थळाव्यांनी रोखडेच गोमेकॉंत व्हेले. उपचारा मजगतीं फ्रान्सीसाक मरण आयलें. जाल्यार दामोदराचेर उपचार करून ताका घरा धाडलो.
अपघाताचो पंचनामो आगशी पुलिसांनी केलो. फुडलो तपास पुलीस निरीक्षक अनंत गांवकार हांच्या मार्गदर्शना खाला पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
