गोंयाक फायदो जावचो

भांगरभूंय | प्रतिनिधी

सैम तिगप गोंयां खातीर सामकें म्हत्वाचें. धिगीच ती. काडली जाल्यार गोंय कोसळूंक वेळ लागचो ना.

भाजपाचे गोंयचे अध्यक्ष सदानंद शेट तानावडे हांची अपेक्षे प्रमाण राज्यसभे खातीर निवड जाल्या. आदले खासदार विनय तेंडुलकार हांचो जागो ते घेतले. राज्यांत भाजपाक भोवमत आशिल्ल्यान वेंचणुकेंत श्री. तानावडेच वेंचून येवपाचे. तेच खातीर एकाय विरोधकान तांचे आड आपलो उमेदवार दवरूंक ना. गोंयांत भाजपाक बरे दीस दिसचे म्हूण बरीच मेहनत घेवपी तानावडे हांचेर खासदार म्हूण आतां व्हड जापसालदारकी आयल्या आनी ते खासदारकेचो गोंयाक फायदो करून दितले, अशी आस्त. आतां मेरेन एदुआर्द फालेरो, जाॅन एफ फर्नांडीस, शांताराम नायक, विनय तेंडुलकार हांकां राज्यसभा खासदारकी मेळ्ळ्या. फालेरो हे लोकसभेचे खासदार, मंत्रीय आशिल्ले. मात, राज्यसभा खासदार म्हूण सगल्यां परस चड सक्रीय थारले ते सर्गेस्त शांताराम नायक. संसदेच्या ह्या वरिश्ठ सभाघरांत चडश्यो नेमणुको ह्यो राजकी आसतात, कांय वेंचणुकां वरवींय जातात. पूण, ह्या पदाचो आनी अधिकारांचो वापर आपल्या राज्या खातिरुय करूं येता, हें तितलेंच खरें.
लोकसभेचे वट्ट वांगडी 545. तातूंतले 543 वेंचणुके वरवीं वेंचून काडटात, तर 2 अँग्लो इंडियन समाजाचे प्रतिनिधी राष्ट्रपती नेमतात. (जानेवारी 2020 सावन ही नेमणूक कायद्यान बंद केल्या.) राज्यसभेचे वांगडी 250. तातूंतले 238 वेंचणुके वरवी राज्यांनी धाडपाचें. उरिल्ले 12 जाण कला, खेळ, साहित्य, समाजकार्य अशा मळा वयल्यान वेंचून काडटात. ही नेमणूक राष्ट्रपती करतात. कांय नेमिल्ले खासदार राज्यसभेंत 15 दीस पसून वचनात. पूण तांतूंतल्या कोणाचोय देशाच्या कारभारा खातीर फायदो जावं येता म्हूण ही तरतूद अजून दवरल्या. परराष्ट्र मंत्री एस. जयशंकर हे आदले परराष्ट्र सचीव. तांकां गुजरातांतल्यान राज्यसभेचेर धाडल्यात. सरकाराक जाय जाल्यार हुशार, जाणकार, कुशळ अधिकाऱ्याक राज्यसभेर वेंचून हाडून मंत्री करपाक मेळटा. पूण अशें चुकूनच जाता. खरें म्हणल्यार त्या- त्या मळा वयल्या खांप्या जाणकारांक 2- 3 तरी म्हत्वाचीं मंत्रीपदां मेळपाक जाय. तशें केल्यार देश वयर काडपाक चड त्रास घेवचे पडचे नात.
गोंयचे नवे राज्यसभा खासदार तानावडे हे पिर्णाचे. थळाव्या राजकारणांत पावल घाले उपरांत ते थिवी मतदारसंघांतल्यान विधानसभेर वेंचून गेले. 2002 त तांणी एनसीपीच्या नीळकंठ हळर्णकार हांकां 521 मतांनी हारयिल्ले. फुडले 2007 चे वेंचणुकेंत हळर्णकार हे तांकां 324 मतांनी हारोवन जैतिवंत जाले. मागीर तानावडे हांणी आमदारकेचो हावेस सोडून पक्ष संघटणा बळिश्ट केली. आतां ते दिल्लीच्या राजकारणांत पावल्यात. तांकां संघटणात्मक वावराचो अणभव, जनसंपर्कूय दांडगो. ईडीसीचे ते बरोच काळ अध्यक्ष आसात. त्या मळाचीय म्हायती तांकां आसा. गोंया सामकार सध्या म्हादयचो प्रस्न आसा. कर्नाटकांत भाजपा सत्तेर आशिल्ली तेन्ना म्हादय वळोवपाचेर भाजप फुडारी ठाम आशिल्ले. आतां सत्तेर आयिल्ल्या काँग्रेस सरकारूय त्याच विचारांचें. तांणी तर बजेटांत हजार कोटी रुपयांची म्हादय खातीर तजवीज केल्या. गोंयांत पावस रकता, खूब खूब पावस कोसळटा, हें खरें आसलें तरी मार्च ते जून मेरेनचे चार म्हयने उदका खातीर आमकां वळवळे काडचे पडटात. तेन्ना म्हादयक लागून गोंय तानेन खासावीस जावचें ना, हाची जतनाय खासदार तानावडे हांकां घेवची पडटली.
गोंयचें पर्यावरण इबाडलां. आतां जे दोंगर उरल्यात, ते फुडल्या पांच वर्सां भितर बोडके जातले. सैम तिगप गोंयां खातीर सामकें म्हत्वाचें. धिगीच ती. काडली जाल्यार गोंय कोसळूंक वेळ लागचो ना. गोंयचो सैम बेणप चालू आसा, ताचे आड खासदार तानावडे हांणी राज्यसभेंत यत्न करचे. गोंयांत रोजगाराची समस्या आसा. तिवूय सोडोवपाक जाय. हांगाची एकूण म्हारगाय पळयल्यार तीग जाणांच्या कुटुंबाक आवांतांत जगपाक म्हयन्याक उणोच 25 ते 30 हजार रुपया पगार जाय. ईडीसीचे अध्यक्ष आशिल्ल्यान गोंयकार तरणाट्यांक कसले कारखाने मानवतात, ते नेमकी कसली नोकरी करपाक सोदतात, हाची तानावडे हांकां जाण आसा. गुजरात, तेलंगणांत वा हेर राज्यांनी नामनेच्या कंपनींचे व्हडले कारखाने आसात, तसले गोंयांत येवचे. तेवूय प्रदुशण करिनात तसले. गोंयकार विद्यार्थ्यांची आयटी, कोडींग, रोबोटिक्स हांचे कडेन ओड दिसता. तसलें शिक्षण आनी रोजगार तांकां गोंयांतूच मेळचो. खासदार तानावडे हांणी झिरो अवराकूच न्हय, तर बाकी कामकाजा वेळारूय राज्यसभेचे हिरो जावचें. तांकां परबीं.