भांगरभूंय | प्रतिनिधी
ऑफ स्पिनर मोहीत रेडकार (5-13) हाचे बॉलिंगे नेटार आनी अझान थोटा आनी अभिनव तेजराणा हांचे बॅटिंगे नेटार गोंयान 23 वर्सां पिराये सकयले वन डे क्रिकेट सर्तींत त्रिपुरा पंगडाक 10 विकेटींनी हारयलो.
गोंयच्या पंगडाचे सर्तींतलें हें दुसरें जैत थारलें. लाहिरीच्या चौधरी बन्सीलाल स्टेडियमाचेर खेळयिल्ली ही मॅच फकत 36.5 ओव्हरींनी सोंपली. गोंयान टॉस जिखून पयलीं फिल्डिंग करपाचो निर्णय घेतलो आनी त्रिपुरा पंगडाचो डाव 26.1 ओव्हरींनी फकत 76 धांवड्यांचेर सोंपयलो.
गोंया वतीन मोहित रेडकारान जबरदस्त प्रदर्शन केलें. ताणें 10तल्यो तीन ओव्हरी मेडन घालून फकत 13 धांवड्यांनी 5 विकेटी घेतल्यो. मोहितान अजून मेरेन 5 मॅचींतल्यान 20 विकेटी घेतल्यात. दोन खेपे पांच विकेटी घेतल्यात. ताका फास्ट बॉलर शुभम तारीन (2-23), स्पिनर दीप कसवणकारान (2-13), सनिकेत पालकारान (1-18) बरी साथ दिली.
जैता खातीर गरजेच्यो धांवड्यो गोंयान 10.4 ओव्हरींनी एकूय विकेट वगडायनासतना काडल्यो.
अझान थोटान 33 बॉलांनी आठ चवक्यांचे मजतीन नाबाद 38 आनी अभिनव तेजराणान 31 बॉलांनी स चवके आनी दोन सक्यांचे मजतीन नाबाद 39 धांवड्यो केल्यो.
गोंय लीग पांवड्या वयली आपली निमाणी मॅच 9 नोव्हेंबराक ओडिशा आड खेळटलो.
थोडे भितर धांवतकटोः त्रिपुरा, 26.1 ओव्हरींनी सगले बाद 76 धांवड्यो (सेंतू सरकार 13, अमित अली 10, चंदन रे 14, अभिजीत देबबर्मा 11 धांवड्यो, शुभम तारी 6.1-1-23-2, सनिकेत पालकार 4-0-18-1, मोहित रेडकार 10-3-13-5, सुजय नायक 2-0-8-0, दीप कसवणकार 4-0-13-2) हार आड गोंय, 10.4 ओव्हरींनी बिनबाद 78 धांवड्यो (अझान कोटा नाबाद 38, अभिनव तेजराणा नाबाद 39 धांवड्यो).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
