भांगरभूंय | प्रतिनिधी
वीज मंत्रीः दरेका मतदारसंघांत भुंयगत वीज कॅबलाचीं 60 कोटींचीं कामां
भांगरभूंय । प्रतिनिधी
पणजी : गोंयाक तमनार प्रकल्पाची गरज आसा. तमनार प्रकल्पाक लागून गरजेच्यो अश्यो मुळाव्यो सुविधा तयार जातल्यो, अशें वीज मंत्री सुदिन ढवळीकार हांणी सभाघरांत स्पश्ट केलें.
आपणे तमनार प्रकल्पाक केन्नाच विरोध करूंक ना. मात प्रकल्पाच्या पयलीच्या एलायनमेंटाक आपणे विरोध केल्लो. गोंयची विजेची गरज वाडत आसा. वाडटी गरज पुराय करपा खातीर तमनाराची गरज आसा. तमनार प्रकल्पाचो आपणे पुराय अभ्यास केला, अशें ढवळीकार हांणी सांगलें.
सभाघरांत बिरेस्तारा अक्षय उर्जा आनी वीज खात्याच्या मागण्यांचेर चर्चा जावन मान्यताय मेळ्ळी. चर्चेक जाप दितना वीज मंत्री सुदिन ढवळीकार हांणी ही म्हायती दिली.
वीज पुरवण सुदारपा खातीर भुंयगत वीज कॅबल घालपाची गरज आसा. एलटी लायनी भुंयगत करपा खातीर 30 ते 40 हजार कोटी रुपया खर्च येतलो. हें शक्य जावचें ना. सध्या 33 केव्ही आनी 11 केव्ही लायनी भुंयगत करतले. दरेका मतदारसंघांत एचटी लायन भुंयगत करपाची 60 कोटींचीं कामां जातलीं, अशें आस्वासन वीज मंत्र्यान दिलें.
वीज बिलांची थकबाकी वसूल करपाची प्रक्रिया सुरू आसा. जांणी कोणें बिलां फारीक करूंक नात, तांचे आड गुन्यांव नोंद जाल्यात. सरकारी खात्यांची थकबाकी अर्थीक फांट्या वरवीं (बूक ऑफ अकावंट ट्रान्सफर) जातली. कावलां अड्यां कडल्यान वीज बिलांची वसुली जातली. गिरायकांनी मान्यताय घे नासताना लोड वाडयल्ल्यान वीज फ्लक्चुएट जाता. दरेका घरांतलो लोड तपासपाचो सर्वे केल्यार लोक बेजार जातले, अशें वीज मंत्र्यांनी सांगलें.
नव्या सौर उर्जा धोरणाचेर सुचोवण्यो मागयतले
गोंय उर्जा उदरगत प्राधिकरणा वरवीं (गेडा) नवें सौर उर्जा धोरण तयार जातलें. सुचोवण्यो आनी हरकती खातीर फुडल्या म्हयन्यांत मसुदो उक्तो जातलो.
चार्जींग स्टेशना खातीर कोण फुडें येना
गोंयांत चार्जींग स्टेशनाचो आकडो उणो आसा. गोंयांत सध्या 2,347 इलेक्ट्रीक गाडयो आसात. तांकां 15 कोटी रुपयांच्या अनुदानाचें वांटप जालां. तशेंच आमठाणे, चापोली, साळावली आनी अंजुणें धरणाचेर सोलर पॅनल बसयल्यात.
केंद्र सरकाराचे येवजणेंतल्यान शेतकारांक 900 सोलर पंप दिल्यात. गेडा कडेन सोलर पंपा खातीर 300 अर्ज आयल्यात. गोंयांत रूफ टॉप सोलर पॅनल येवजणेचो 875 घरांनी लाव घेतला. हातूंतल्यान 46.20 मेगावॉट विजेची निर्मिती जाल्या. सरकारान 7 कोटी 6 लाख रुपयांचें अनुदान वांटप केलां, अशें मंत्री ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
