भांगरभूंय | प्रतिनिधी
मुख्यमंत्र्यान भेटयलें अर्थमंत्री निर्मला सीतारमण हांकां निवेदन
भांगरभूंय । प्रतिनिधी
पणजीः गोंयांतल्या विवीध मळांचे उदरगती खातीर फुडल्या वर्साच्या अर्थसंकल्पांत घसघशीत निधीची तजवीज करची, अशी मागणी करून ते संबंदांतलें निवेदन मुख्यमंत्री डॉ. प्रमोद सावंत हांणी केंद्रीय अर्थमंत्री निर्मला सीतारमण हांकां शुक्रारा भेटयलें.
जीएसटी तशेंच राज्यांच्या अर्थसंकल्पपूर्व मागण्या संबंदांत सीतारमण हांणी शुक्रारा राजस्थानांतल्या जैसलमेरांत बसका आयोजीत केल्ली. हे बसकेक मुख्यमंत्री डॉ. प्रमोद सावंत हांणी हाजेरी लायली. केंद्राच्या फुडल्या वर्साच्या अर्थसंकल्पांत गोंयच्या फुडारांतले उदरगती खातीर गरजेचे प्रकल्प आनी ते खातीर लागपी निधीची अर्थसंकल्पांत तजवीज करपाची मागणी तांणी सीतारमण हांचे कडेन केली.
केंद्रीय अर्थसंकल्पांतल्यान गोंयांतल्या खाजन शेतीच्या पुनर्वसना खातीर 500 कोटींच्या निधीची तजवीज करपाची मागणी डॉ. सावलंत हांणी केल्या. आयटी मळार काम करप्यांक खूब खेपे प्रवासा वेळार आडखळी येतात. ताका लगून तांचे खातीर गोंयांतल्यान बंगळुरू, पुणे, हैदराबाद ह्या मार्गांचेर ‘वंदे भारत’ रेल्वे सुरू करपाची मागणी तांणी केल्या. गोंय पश्चीम घांट वाठारांत येता. पश्चीम घांटांत गोंयचे हद्दींत येवपी वाठाराची राखण आनी संवर्धन करपाची खर गरज आसा. ते खातीर ह्या वाठाराच्या संवर्धना खातीर एक हजार कोटींची तजवीज अर्थसंकल्पांत करची. कोंकण रेल्वे खाला जाळें विणपा खातीर 6,500 कोटींची तजवीज करची. तशेंच उदक पुरवणेच्यो पोरण्यो पायपलायनी बदलपा खातीर एक हजार कोटींची तजवीज करची, अश्यो मागण्यो मुख्यमंत्र्यान केंद्र सरकारा कडेन केल्यात.
संसदेचें अर्थसंकल्पीय अधिवेशन 1 फेब्रुवारी 2025 ह्या दिसा सावन सुरू जातलें. अर्थमंत्री निर्मला सीतारमण त्याच दिसा संसदेंत अर्थसंकल्प सादर करतली. केंद्रीय अर्थसंकल्प सादर करचे आदीं देशांतल्या विवीध राज्यांच्यो मागण्यो केंद्र सरकाराक विचारांत घेवच्यो पडटात. ते प्रमाण राज्यांचे उदरगती खातीर निधीची तजवीज करची पडटा. ते नदरेन सीतारमण हांणी शुक्रारा राज्यस्थानांत बसका घेवन विवीध राज्यांच्या मुख्यमंत्र्यां कडेन वैयक्तीक चर्चा करून तांच्या राज्यांतले म्हत्वाचे प्रकल्प, येवजण्यांचो नियाळ घेतलो आनी ते खातीर लागपी निधीचो अदमास घेतलो.
मागण्यो पुराय जावपाचो मुख्यमंत्र्यांक विस्वास
प्रधानमंत्री नरेंद्र मोदी हांच्या फुडारपणा खालचें सरकार केंद्रांत स्थापन जायत सावन गोंय सरकारान केंद्रा कडेन केल्ल्यो चडश्यो मागण्यो पुराय जाल्यात. ताचे फुडें वचून केंद्र सरकारान गोंयांतल्या मुळाव्या साधनसुविधांनी वाड करचे खातीर अतिरिक्त निधी लेगीत दिला. ते खातीर अंदूंच्या अर्थसंकल्पांतल्यान गोंयच्यो मागण्यो पुराय जातल्यो असो विस्वास मुख्यमंत्री डॉ. प्रमोद सावंत हांणी बाळगिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
