भांगरभूंय | प्रतिनिधी
पणजीः गोंय राज्याक 2024 चो उत्कृश्ट रॉमेंटीक डेस्टिनेशन हो पुरस्कार फावो जाला. लिजर प्लस ट्रेव्हल हे नामनेचे संस्थेन देशी पर्यटन थळ श्रेणींत गोंय राज्याची निवड केल्या. पूण आंतरराष्ट्रीय पर्यटन थळ श्रेणींत गोंयान सुवात मेळोवंक ना.
आंतरराष्ट्रीय पर्यटन थळां, विमानां, क्रूझ, हॉटेल हे विशींची म्हायती दिवपी तशेंच पर्यटन आनी येरादारी विशीं ब्लॉग्स आनी नेमाळे उजावडाक हाडपी लिजर प्लस ट्रेव्हल ही नामनेची संवसारीक पांवड्या वयली संस्था. ही संस्था दर वर्सा देशी आनी संवसारीक पांवड्यार वेगवेगळ्या श्रेणींत उत्कृश्ट पर्यटन थळ हे पुरस्कार घडोवन हाडटात. हे संस्थेचे वेबसायटीक भेट दिवपी, ब्लॉग वाचपी, नेमाळे सस्क्रायब करपी प्रेक्षक तशेंच तज्ञ आपल्या आवडत्या थळांक मत दिता आनी जाका मतां चड तो जैतवंत थारता. 2024 वर्सा खातीर लोकांनी गोंय हें भारताचें उत्कृश्ट रॉमेंटीक थळ म्हूण निवड केल्या. देशी श्रेणींत हो भोवमान गोंय राज्याक फावो जाला. जाल्यार अंदमान आनी निकोबार ह्या जुंव्यांक उत्कृश्ट दर्यादेग थळ हो पुरस्कार फावो जाला, पश्चिम बंगाल राज्याक उत्कृश्ट जेवणाचें थळ, सिक्कीमाक उत्कृश्ट उदयन्मूख थळ, अरुणाचलाक उत्कृश्ट पाचवेंचार थळ, ओडीशाक उत्कृश्ट दायज थळ, उत्तर प्रदेशाक उत्कृश्ट आध्यात्मीक थळ, महाराष्ट्राक उत्कृश्ट राज्य, राजस्थानाक उत्कृश्ट लग्न सुवाळ्याचें थळ, केरळ उत्कृश्ट भलायकेचें थळ आनी मध्य प्रदेश राज्याक उत्कृश्ट वन्यजीव थळ म्हणून पुरस्कार फावो जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
