भांगरभूंय | प्रतिनिधी
मुख्यमंत्री : आंतरराष्ट्रीय आयुर्वेदीक आनी वेलनेस संमेलनाचें उक्तावण
भांगरभूंय । प्रतिनिधी
पणजी : गोंयाक आयुर्वेद आनी भलायकी पर्यटनाचें केंद्र करचे खातीर सरकार यत्न करता. ह्या मळा वयले दोतोर, संशोधक, उद्देजकांनी फुडाकार घेवन गोंयांत ह्या मळा वयले प्रकल्प सुरू करचे, असो उलो मुख्यमंत्री डॉ. प्रमोद सावंत हांणी मारलो.
पयल्या आंतरराष्ट्रीय आयुर्वेदीक आनी वेलनेस संमेलनाच्या उक्तावण सुवाळ्यांत मुख्यमंत्री उलयताले. ह्या वेळार आचार्य बालकृष्ण, खासदार सदानंद शेट तानावडे, डॉ. राजेंद्र बडवे, डॉ. स्नेहा भागवत, डॉ. पी. के. प्रजापती, प्रतिमा धोंड आनी हेर अधिकारी उपस्थीत आशिल्ले.
मुख्यमंत्र्यान सांगलें, गोंय सरकारान हालींच गोंय वेलनेस आनी आयुर्वेद धोरण 2026 चालीक लायलां. ते प्रमाण आयुष आनी संलग्न क्षेत्रांतल्या दोतोरांक गोंयांत उपली प्रॅक्टीस करप सोंपें जालां. नव्या धोरणा वरवीं गोंयची वळख फक्त सी, सन अॅण्ड सॅण्ड अशी उरची ना, हे खातीर आमी यत्न करतात. गोंयांत आयुर्वेदीक संशोधन, सैम मोगी प्रकल्प, कुशळटाय उदरगत, जापसालदार पर्यटनाक सरकार सदांच तेंको दितलें. ह्या धोरणाचो सगल्या भागधारकांनी फायदो करून घेवचो. हाचे मुखार हें संमेलन दर वर्सा गोंयांत आयोजीत करतले.
आयुर्वेद फक्त एक वखद प्रणाली नासून जियेवपाची शैली आसा. हातूंत कूड आनी मन, सैम आनी मनशाचो समतोल आसा. आयुर्वेद दुयेंस बरें करपा वांगडाच भलायकेची जतनाय लेगीत घेता. ही वखध प्रणाली सहज आनी सवाय दरांत उपलब्ध आसा. आयुर्वेद हें भारतान संवसाराक दिल्लें सगल्यांत व्हड देणें आसा. आयुर्वेद आमचे प्राचीन संस्कृतीच्या मुळां कडेन व्हरता. युवा पिळगेन हे परंपरेचो अभ्यास करप गरजेचें आसा. भारतीय वखद प्रणालीक हाचे मुखार लेगीत गोंय सरकार तेंको दितलें, अशें मुख्यमंत्री डॉ. सावंत हांणी सांगलें.
गोडेंमूत दुयेंतींचो आंकडो हुस्क्याचो : आचार्य बालकृष्ण
पतंजलीचे संचालक आचार्य बालकृष्ण हांणी सांगलें, गोंयांत दर चारां मदले एके व्यक्तीक गोडेंमूत आसा. आयुर्वेदीक उपचार पद्दती वरवीं हें प्रमाण उणें करपा खातीर यत्न जावपाक जाय. कांय अस्तंत संस्था भारतीय आयुर्वेदीक वखदांचें पेटंट घेवपाचे यत्न करतात, हाचेरूय लक्ष दिवपाक जाय.
कांक्राचें प्रमाण उणें करप शक्य : डॉ. बडवे
अस्तंत देशाचे तुळेंत भारतांत तशेंच गोंयांत दर एक लाख लोकां मदीं कांक्राचें प्रमाण तुळेंत उणें आसा. आयुर्वेद, योग्य जिणेशैली हांच्या आदारान कांक्र जावपाचें प्रमाण 70 टक्क्यांनी उणें करपाक मेळटा, अशें डॉ. राजेंद्र बडवे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
