भांगरभूंय | प्रतिनिधी
रस्ते येरादारी आनी म्हामार्ग मंत्रालयाचे आंकडेवारींतल्यान स्पश्ट
भांगरभूंय । प्रतिनिधी
पणजीः राष्ट्रीय इलेक्ट्रीक बस कार्यावळी काला (एमईबीपी) केंद्रान आतां मेरेन गोंयाक 153 इलेक्ट्रीक बशी दिल्यात, अशें रस्ते येरादारी आनी म्हामार्ग मंत्रालयान सादर केल्ले आंकडेवारींतल्यान मुखार आयलां.
गाडयांक लागून वाडत आशिल्लें प्रदुशण आडावपा कातीर एनईबीपी कार्यावळी खाला देशांतल्या सगळ्याच राज्यांक इलेक्ट्रीक आनी हायब्रीड इलेक्ट्रीक बशी दिवपाचो निर्णय कांय वर्सां आदीं केंद्र सरकारान घेतिल्लो. ते प्रमाण रस्ते येरादारी आनी म्हामार्ग मंत्रालया वतीन सगळ्याच राज्यांक इलेक्ट्रीक बशी लेगीत दिवपाक सुरवात केली. ते प्रमाण गोंयाक आतां मेरेन 153 बशी मेळिल्ल्याचें मंत्रालयाचे आंकडेवारींतल्यान मुखार आयलां.
एनईबीपी कार्यावळी खाला रस्ते येरादारी आनी म्हामार्ग मंत्रालयान आतां मेरेन 30 राज्यांक 10,677 इलेक्ट्रीक बशी दिल्यात. तातूंत 10,190 इलेक्ट्रीक आनी 487 हायब्रीड इलेक्ट्रीक बशींचो आस्पाव आसा.
सगळ्यांत चड 2,543 इलेक्ट्रीक बशी दिल्लीक दिल्यात. ते उपरांत 2,448 बशी महाराष्ट्राक दिल्यात. जाल्यार सगळ्यांत चड हायब्रीड बशी कर्नाटकाक दिल्यात, अशेंय अहवालांत म्हणलां. मजगतीं, गोंयांत इलेक्ट्रीक बसी सुरू जायत सावन तांचो प्रवाशांक खूब फायदो जाता. तेच वांगडा प्रदुशण उणे करपाक लेगीत मजत जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
