भांगरभूंय | प्रतिनिधी
म्हापशें: गोंय हें ल्हान राज्य आसा. आमकां आण्वीक उर्जा प्रकल्पाची गरज ना, केंद्रीय उर्जा मंत्री मनोहरलाल खट्टर हांच्या आण्वीक उर्जा प्रकल्पा विशींच्या विचारांचें विरोधकां कडल्यान राजकारण जाता. जंय विशय आनी मुद्दे नासतात, तेन्ना काँग्रेसीतले लोक लोकांची दिशाभूल आनी फटीचो प्रचार करतात असो आरोप करून आमी केन्नाच आण्वीक उर्जा प्रकल्प गोंयांत हाडचे नात अशें स्पश्टीकरण मुख्यमंत्री डॉ. प्रमोद सावंत हांणी दिलें.
मंगळारा 13 वेर म्हापश्यां आयोजीत भाजप कार्यकर्त्यांच्या मेळाव्यांत ते उलयताले. ह्या वेळार प्रदेशाध्यक्ष दामू नायक खासदार सदानंद शेट तानावडे, उपसभापती ज्योशुआ डिसोझा, उत्तर गोंय जिल्हो मंडळ अध्यक्ष दयानंद कारबोटकार, नगराध्यक्षा प्रिया मिशाळ, मंडळ अध्यक्ष योगेश खेडेकार आनी हेर पदाधिकारी आनी कार्यकर्ते व्हड संख्येने हाजीर आशिल्ले.
मुख्यमंत्री डॉ. सावंत हांणी मुखार म्हणलें, आमकां गोंयकारांची आनी पर्यावरणाची काळजी आसा. काँग्रेस लोकांची दिशाभूल करता. काँग्रेसी कडेन विशय नाशिल्ल्यान ते लोकां मदीं चुकीची म्हायती पातळायतात. ते वेंचणुकां पुरतेच लोकां मदीं वतात. आमी विरोधांत आसतनाय लोकां मदीं वताले. लोकांनी काँग्रेसीच्या फटीच्या प्रचाराक बळी पडचे न्हय.
काँग्रेसीन आपल्या कार्यकाळांत केन्नाच कांयच केलें ना. 2005 ते 2012 ह्या काळांत काँग्रेसीचें डबल इंजिनाचें सरकार आशिल्लें. तेन्ना तांच्या सरकारान गोंयांत कसलोच प्रकल्प हाडलो ना. जाल्यार मोदी सरकाराक लागून आमी गोंयांत 30 हजार कोटी रुपया फक्त मुलभूत विकासाचेर खर्च केले अशें मुख्यमंत्र्यांनी म्हणलें.
ह्या वेळार राज्यसभा खासदार सदानंद शेट तानावडे, प्रदेशाध्यक्ष दामू नायक हांणी कार्यकर्त्यांक मार्गदर्शन केलें.
पहलगाम आतंकी हल्ल्या उपरांत प्रधानमंत्री नरेंद्र मोदी हांच्या मार्गदर्शना खाला सरकारान आतंकवाद्यांक जशी जाय आशिल्ली तशी जाप दिली. पाकिस्तानांत घुसून भारतीय सैन्यान आतंकवांद्यांचे णव अड्डे मातयेभरवण केले. हे कारवायेंत आमी पाकिस्तानांतल्या सामान्य लोकांचें लुकसाण केलें ना. आमचें झूज हें खंयच्याच धर्मा आड नाशिल्लें जाल्यार फक्त आतंकवादा आड आशिल्लें. मोदी सरकार आतंकवांद्यांक नानपयत केले बगर ओगी बसचें ना. पाकिस्ताना वटेन वचपी सिंधू न्हंयचें उदक आडावपाचो केंद्र सरकाराचो निर्णय योग्यूच आशिल्लो अशें मुख्यमंत्री डॉ. प्रमोद सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
