भांगरभूंय | प्रतिनिधी
मुख्यमंत्री : चित्रपट उर्बा येवजण पुनरुज्जीवीत करतले
56 व्या इफ्फीचें उक्तावण, चित्ररथांची मिरवणूक
गोंयाक देशाचे कल्पकतेची राजधानी करपाचो हांवेस
भांगरभूंय । प्रतिनिधी
पणजी : गोंय सरकार गोंयाक आंतरराष्ट्रीय चित्रपट निर्मिती हब करचे खातीर यत्न करता. ताचोच एक भाग म्हूण आंतरराष्ट्रीय हबा खातीर पुरक थारतले अशे पद्दतीन चित्रपट उर्बा येवजण पुनरुज्जीवीत करतले, अशें मुख्यमंत्री डॉ. प्रमोद सावंत हांणी सांगलें. बिरेस्तारा पोरणें जीएमसी वाठारांत 56 व्या इफ्फीच्या उक्तावण सुवाळ्यांत ते उलयताले. ह्या वेळार केंद्रीय म्हायती आनी प्रसारण राज्यमंत्री एल. मुरुगन, राज्यपाल अशोक गजपती राजू, केंद्रीय मंत्री श्रीपाद नायक, खेशक कपूर, अभिनेते एन. बालकृष्णन, अनुपम खेर हाजीर आशिल्ले.
मुख्यमंत्र्यान सांगलें, गोंयांतलें सैमीक सौंदर्य सगळ्यांकूच भुरळ घालता. हांगाच्यो मुळाव्यो सुविधा, पर्यटन हाका लागून लेगीत चित्रपट निर्मिती खातीर गोंयची निवड करतात. तातूंत राज्य सरकाराची भुमिका लेगीत तितलीच म्हत्वाची आसा. चित्रपट निर्मिती खातीर तत्काळ परवाने दिवप, निर्मात्यां खातीर येवजण्यो, एक जनेल उपक्रम हाका लागून लेगीत फाटल्या कांय वर्सांत गोंयाक आंतरराष्ट्रीय चित्रपट निर्मिती खातीर प्राधान्य दितात. इफ्फी, फिल्म बाजार सारके उपक्रम हाचे खातीर हातभार लायतात.
आंतरराष्ट्रीय पांवड्या वयल्या चित्रपट निर्मात्यांनी गोंयाक सैमीक सौंदर्या सयत, कामाची खोशी आनी बरो सरकारी तेंको हाचे खातीर वेंचचें अशें आमकां दिसता. गोंय हें फक्त स्थळ नासून एक अणभव आसा. आमकां गोंयक देशाचे कल्पकतेची राजधानी करपाक जाय. ताचे खातीर आमी भारतीय चित्रपट निर्मात्यांक लेगीत गोंयांत येवपाचें आमंत्रण दितात. तांणी हांगा येवन शुटींग करचें, थळाव्या कलाकारांक संद दिवन नवी कथा तयार करची. चित्रपट निर्मात्यांचे कल्पकतेंत आस्पावीत जावचे खातीर गोंय सदांच इत्सूक आसता, अशें मुख्यमंत्र्यान सांगलें. प्रधानमंत्री नरेंद्र मोदी हांच्या फुडारपणा खाला भारत देश आंतरराष्ट्रीय सॉफ्ट हब म्हूण वयर येता. भारतीय चित्रपट आंतरराष्ट्रीय पांवड्याचेर पावला. इफ्फी भारतीय कलाकार, निर्मात्यांक आंतरराष्ट्रीय माची उपलब्ध करून दिता. फाटलीं खूब वर्सां हाचे खातीर एक प्रवेशदार म्हूण गोंय राज्य काम करता, हाचो आमकां अभिमान आसा. इफ्फी येसस्वी करपांत थळावे गोंयकार, थळावे कलाकार, सरबराय मळ, सांस्कृतीक संस्था हांचे एकवटीत यत्न आसात, अशें मुख्यमंत्र्यान सांगलें.
भारतीय चित्रपट मळाक संद : एल. मुरुगन
इफ्फी ही माची भारतीय चित्रपट सृश्टीक एकवटान फुडें घेवन वचपाची एक संद आसा. इफ्फीच्या माध्यमांतल्यान ऑरेंज इकॉनॉमीचे आदारस्तंभ आशिल्ल्या कन्टेन्ट, क्रियेटिव्हीटी आनी कल्चर हांकां संद दिता, अशें राज्यमंत्री एल. मुरुगन हांणी सांगलें.
एन. बालकृष्णन हांचो भोवमान
उक्तावण सुवाळ्या वेळार चित्रपट सृश्टीक 50 वर्स् योगदान दिल्ले खातीर तेलगू अभिनेते एन. बालकृष्णन हांचो भोवमान केलो. ह्या वेळार तांणी आपल्या कुटुंबियां सयत प्रेक्षकांचें उपकार मानले. अभिनेतो अनुपम खेर हांणी गोंयांतल्या दरेका व्यक्तीच्या मनांत इफ्फीक वेगळी सुवात आशिल्ल्याचें सांगलें. ते उपरांत जाल्ले चित्ररथ मिरवणुकेन हाजीर आशिल्ल्यांची मनां जिखलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
