भांगरभूंय | प्रतिनिधी
पणजीः आयच्यान फुडले दोन दीस उणो पावस पडपाची शक्यताय हवामान खात्यान उक्तायल्या. देखून शेनवारा श्रीगणेशाचे अागमत जातना पावसाची कसलीच आडखळ येवपी ना. 7 ते 9 सप्टेंबर ह्या काळांत उण्या प्रमाणांत पावस पडपाची शक्यताय हवामान खात्यान उक्तायल्या. ह्या तीन दिसां पावसाचो अलर्ट जारी करूंक ना. पूण 10 तारखेक येलो अलर्ट जारी केला.
शुक्रारा राज्यांतल्या कांय घरांनी गणाराय पावलो. दिसांत पावस पडून गणपती हाडपाक आडखळ जाली ना. शुक्रारा पणजे चडांत चड तापमान 1.7 अंश वाडून 31.4 अंश जाल्यार मुरगांवां चडांत चड तापमान 1.9 अंश वाडून 31.4 अंश जालें. पणजे उण्यांत उणें तापमान 26 अंश जाल्यार मुरगांवां उण्यांत उणें तापमान 25.8 अंश आशिल्लें. गोंयांत चडांत चड तापमान 31 ते 32 अंश आसपाची शक्यताय आसा आनी फुडले पांच दीस उण्यांत उणें तापमान 26 अंश सेल्सियस आसपाची शक्यताय आसा.
गोंयांत 1 जून ते 6 सप्टेंबर ह्या काळांत सरासरी 159.42 इंच पावस पडला. अंदूं पावसाचें प्रमाण 45.9 टक्क्यांनी चड आसा. मजगतीं, वाळपय सगळ्यांत चड 206.73 इंच पावस पडला. ताचे उपरांत सांगें 197.08 इंच, सांखळे 174.66 इंच, केपें 174 इंच, पेडणें 164.10 इंच, पोरणें गोंया 157 इंच, फोंड्यां 155.81 इंच, काणकोणां 150.79 इंच, पणजे 147.29 इंच, मडगांवां 146.45 इंच, मुरगांवां 138.53 इंच आनी दाबोळे 124.15 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
