भांगरभूंय | प्रतिनिधी
केंद्रीय भलायकी राज्यमंत्री प्रतापराव जाधव हांची राज्यभेंत लेखी जाप
भांगरभूंय । प्रतिनिधी
पणजी : गोंयांत 2019 ते 2024 ह्या काळांत कांक्राचे दुयेंती 12 टक्क्यांनी वाडल्यात. 2019 त गोंयांत विवीध तरांच्या कांक्राचे 1,591 दुयेंती सांपडिल्ले. 2024 चे निमाणे मेरेन ते वाडून 1,783 जाले. केंद्रीय भलायकी राज्यमंत्री प्रतापराव जाधव हांणी राज्यसभेंत दिल्ले लेखी जापेंतल्यान ही म्हायती मेळ्ळ्या. हे विशीं खासदार तांगेला उदय श्रीनिवास हांणी अतारांकीत प्रस्न विचारिल्लो.
गोंयांत 2019 ते 2024 ह्या स वर्सांत कांक्राचे वट्ट 10 हजार 79 दुयेंती सांपडिल्ले. हे मजगतीं दर वर्सा दुयेंतींचे संख्येंत वाड जायत गेल्या. 2019 त गोंयांत कांक्राचे 1,591 दुयेंती सांपडिल्ले. 2020 त 1618, 2021 त 1652, 2022 त 1700 दुयेंती सांपडिल्ले. 2023 त तातूंत 35 वाडून 1735 जाले. फाटल्या स वर्सांत गोंयांत 2024 त कांक्राचे सगळ्यांत चड 1783 दुयेंती सांपडले.
पुराय देसांत 2019 ते 2024 ह्या काळांत कांक्राचे 86 लाख 68 हजार 495 दुयेंती सांपडिल्ले. हाचोच अर्थ हे मजगतीं म्हयन्याक सरासरी 1 लाख 20 हजार 395 जाल्यार दिसाक सरासरी 4013 दुयेंती सांपडिल्ले. ह्या काळांत उत्तर प्रदेशांत कांक्राचे सगळ्यांत चड दुयेंती सांपडिल्ले. थंय वर्साक सरासरी 2.1 लाख दुयेंती सांपडिल्ले. ते उपरांत महाराष्ट्रांत वर्साक सरासरी 1.1 लाख, अस्तंत बंगालांत वर्साक सरासरी 1 लाख जाल्यार बिहारांत वर्साक सरासरी 1.01 लाख दुयेंती सांपडिल्ले, अशें जापेंत म्हणलां. भारतीय वैजकी संशोधन परिशदे वतीन (आयसीएमआर) राष्ट्रीय कांक्र नोंदणी प्रकल्प चालीक लायला. हे प्रमाण 2014 ते 2023 ह्या कालांतल्या देशभरांत कांक्राची बादा जाल्ल्या वा ताका लागून मरण आयिल्ल्या दुयेंतींची म्हायती एकटांय केल्या. केद्र सरकाराच्या विवीध संस्था कांक्राच्या दुयेंसाचेर संशोधन करतात. हे खातीर फाटलीं तीन अर्थीक वर्सांत 575 कोटी रुपयांचो निधी मंजूर केला. ते भायर केंद्र सरकार राष्ट्रीय भलायकी मोहिमे खाला राज्य सरकारांक अर्थीक मजत दिता, अशें जापेंत म्हणलां.
गोंयांत दिसाक सरासरी 4 दुयेंती
जापेंत दिल्ले म्हायती प्रमाण गोंयांत 2019 ते 2024 ह्या काळांत कांक्राचो 10 हजार 79 दुयेंती सांपडल्यात. हाचोच अर्थ गोंयांत म्हयन्याक सरासरी 139 म्हणल्यारूच दिसाक सरासरी 4.63 दुयेंती सांपडल्यात.
143 जाणांच्यो काळजांतल्यो गांठी धोकादायक
फाटल्या 8 म्हयन्यांत गोंयांतल्या 33,808 जाणांचे काळजाचे एक्स रे काडले. तातूंत 3144 जाणांच्या काळजांत गांठी आशिल्ल्याचें दिसून आयलें. जाल्यार 143 जाणांच्या काळजांतल्यो गांठी धोकादायक आशिल्ल्याचें भलायकी खात्यान जारी केल्ले आंकडेवारींतल्यान स्पश्ट जालां. ह्या 8 म्हयन्यांत एके व्यक्तीच्या फुफ्फुसाचो कांक्र जाल्ल्याचेंय मुखार आयलां, अशें भलायकी खात्यान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
