भांगरभूंय | प्रतिनिधी
पणजी: गर्मीच्या दिसांनी लेगीत गोंयाक भेट दिवपी पर्यटकांचो आंकडो वाडला. फाटल्या 6 म्हयन्यांत 54 लाखां परस चड पर्यटकांनी गोंयाक भेट दिली.
अधिकृत आंकडेवारी प्रमाण, अंदूं जानेवारी ते जून मजगतीं गोंयांत वट्ट 54.55 लाख पर्यटकांनी भेट दिली. तातूंत 51.84 लाख देशी तर 2.71 लाख विदेशी पर्यटक आशिल्ले. जानेवारींत पर्यटकांची सगल्यांत चड गर्दी जाल्ली. ह्या वेळार 10.56 लाख पर्यटकांनी भेट दिली. तातूंत 9.86 लाख देशी आनी सुमार 70 हजार विदेशी पर्यटक आशिल्ले.
फेब्रुवारींत 9.05 लाख पर्यटकांनी गोंयाक भेट दिली. तातूंत 8.44 लाख देशी जाल्यार 61,000 वयर विदेशी पर्यटक आशिल्ले. मार्चांत 8.89 लाख पर्यटकांनी गोंयाक भेट दिली. तातूंत 8.32 लाख देशी आनी 56,000 वयर विदेशी पर्यटक आशिल्ले.
एप्रीलांत 8.42 लाख पर्यटकांनी गोंयाक भेट दिली. तातूंत 8.14 लाख देशी तर 28,000 विदेशी पर्यटक आशिल्ले. जाल्यार मे म्हयन्यांत 9.27 लाख पर्यटक गोंयांत आयले. तातूंत 8.97 लाख देशी जाल्यार सुमार 30,000 विदेशी पर्यटक आशिल्ले. जूनांत वट्ट 8.34 लाख पर्यटक आयले. तातूंत 8.08 लाख देशी जाल्यार 25,000 विदेशी पर्यटक आशिल्ले. आमी मुखेल स्रोत बाजारांत, देशी आनी संवसारीक पांवड्यार प्रचार मोहीम चड खर केल्या. ह्या यत्नांक लागून दिश्टीकोन वाडला. तशेंच गोंयची वळख फक्त दर्यादेग न्हय जाल्यार ट्रेल्स आनी दायज ते आध्यात्मीक आनी वेलनेस रिट्रीट्स मेरेन विंगड विंगड अणभव दिवपी थळ म्हणून घटमूट केल्या, अशें पर्यटन संचालक केदार नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
