भांगरभूंय | प्रतिनिधी
भांगरभूंय I प्रतिनिधी
पणजी : गोंयांत 46.11 चौखण किलो मिटर इतले खाजगी रान वाठार क्षेत्र आसा. हे विशींची अधिसुचोवणी जारी जाल्या. राना खात्यान 41.20 चौ. किमि खाजगी रान वाठार आशिल्याचे स्पश्ट केलांं. ते भायर खाजगी रान वाठाराचो नियाळ घेवपा खातीर नियुक्त केल्ले समितीन आनीक 4.91 चौ. किमि. खाजगी रान वाठाराचो सोद लायला. हाका लागून वट्ट 46.11 चौ. किमि. खाजगी रान वाठार आशिल्याचें अधिसुचोवणेंत नमूद केलां.
सर्वोच्च न्यायालयान खाजगी रान वाठाराचो सोद घेवन ते निश्चीत करपाचो आदेश 1996 वर्सा दिल्लो. ह्या आदेशाक लागून रान खात्यान खाजगी रान वाठाराचें सर्वेक्षण सुरू केल्लें. सर्वेक्षण करपा खातीर सावंंत आनी कारापुरकार समिती नेमिल्ली. हे समितीक सर्वेक्षणा खातीर बरेच खेपे मुजतवाड दिली. सर्वेक्षणाक आक्षेप घेवपी जनहीत याचिका दाखल जाल्ल्यान ह्या कामाक बरोच कळाव जालो. सावंंत आनी कारापुरकार समितीन सरकाराक अहवाल सादर केल्ले प्रमाण राज्यांत 41.20 चौ. किमि. खाजगी रान वाठार आशिल्याचे स्पश्ट केले.
ह्या अहवालाक राष्ट्रीय हरीत लवादा मुखार आव्हान दिले. ते उपरांत नियाळ घेवपाक आनीक एक समिती 7 जानेवारी 2016 दिसा स्थापन जाली. शर्मा समितीन आनीक 4.91 चौ. किमि. रान वाठार सोदून काडले. ताका लागून सरकारान 46.11 चौ. किमि. रान वाठार आशिल्याची अधिसुचोवणी जारी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
