भांगरभूंय | प्रतिनिधी
हवामान खात्याचो तीन दीस यलो अलर्ट
पणजी: बंगालचे खाडींत तयार जाल्लो उण्या दाबाचो पट्टो आनी हेर वातावरणांतल्या बदलाक लागून गोंयांत 23 ते 25 ऑक्टोबर मजगतीं जोगलां सयत मध्यम ते उटंगाराच्या पावसाची शक्यताय आसा. हे खातीर हवामान खात्यान ह्या तीन दिसां खातीर पावसाचो यलो अलर्ट जारी केला. जाल्यार 26 ते 28 ऑक्टोबर मजगतीं उण्या प्रमाणांत पावस पडपाची शक्यताय उक्तायल्या.
बुधवारा सकाळीं पणजे सयत गोंयच्या कांय वाठारांनी पावस पडलो. फाटल्या कांय दिसांनी पावसान हजेरी लायिल्ल्यान चडांत चड तापमानांत उणाव जाला. बुधवारा पणजेंत चडांत चड 36 अंश जाल्यार उण्यांत उणें 25 अंश सेल्सियस तापमानाची नोंद जाली. मुरगांवां चडांत चड तापमान 33.2 अंश आनी उण्यांत उणें तापमान 25.6 अंश सेल्सियस उरलें.
फुडले स दीस गोंयांत चडांत चड तापमान 33 अंश जाल्यार उण्यांत उणें तापमान 25 अंश सेल्सियस मेरेन उरपाची शक्यताय आसा. गोंयांत 24 ते 26 ऑक्टोबर मजगतीं वाऱ्याचो नेट वराक 35 ते 55 किमि मेरेन पावपाची शक्यताय आशिल्ल्यान नुस्तेमारांनी दर्यांत देंवचें न्हय अशें आवाहन हवामान खात्यान केलां.
गोंयांत चोवीस वरांत 7.1 मिलिमिटर पावसाची नोंद जाल्या. हातूंत केप्यां 18.6 मिमि पावस पडला.
गोंयांत 1 ते 22 ऑक्टोबर मजगतीं सरासरी 3.74 इंच पावसाची नोंद जाल्या. ह्या काळांत पेडण्यां 7.67 इंच, धारबांदोड्यां 4.40 इंच, पणजे 4.39 इंच, सांखळे 4.28 इंच जाल्यार काणकोणां 4.24 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
