भांगरभूंय | प्रतिनिधी
पंचायत मंत्र्याची विधानसभेंत म्हायती
43 बांदकामां मोडपाची चल्ल्या प्रक्रिया
सगल्यांत चड बार्देस म्हालांत नोंद
भांगरभूंय । प्रतिनिधी
पणजी : गोंयांतल्या विवीध पंचायत वाठारांनी 12 जून 2025 मेरेन बेकायदो बांदकामां वा अतिक्रमणांची नोंद जाल्या. हे विशीं पंचायती वतीन पळोवणी सुरू आसा. कांय बांदकामांक नोटीस जारी केल्या. आतां मेरेन तातूंतलीं 43 बांदकामां मोडपाची प्रक्रिया चालू आसा. पंचायत मंत्री मॉवीन गुदिन्हो हांणी विधानसभेंत दिल्ले लेखी जापेंतल्यान ही म्हायती मेळ्ळ्या. हे विशीं आमदार निलेश काब्राल हांणी अतारांकीत प्रस्न विचारिल्लो.
जापेंत दिल्ले म्हायती प्रमाण वट्ट बेकायदो बांदकामां वा अतिक्रमणांतलीं अर्द्या परस अदीक म्हणल्यार 1218 (56.75 टक्के) हीं बार्देस म्हालांतलीं आसात. बार्देसा उपरांत साश्ट म्हालांत सगल्यांत चड बेकायदो बांदकामां वा अतिक्रमणांची नोंद जाल्या. साश्टींत 294 बेकायदो बांदकामां आसात. ते उपरांत तिसवाडी म्हालांत 239, फोंडें म्हालांत 1323, धारबांदोडें म्हालांत 130, काणकोण म्हालांत 69, मुरगांवां 43, दिवचले 42 जाल्यार सत्तरी म्हालांत एक बेकायदो बांदकाम वा अतिक्रमणाची नोंद जाल्या.
बार्देस म्हालांतल्या पेन्ह दी फ्रान्का पंचायत वाठारांत 72 गाड्यांनी अतिक्रमण केल्ल्याचें उक्तें जाल्लें. पंचायतीन ह्या सगल्यांक बांदकाम मोडपाची नोटीस धाडल्या. आतां मेरेन तातूंतलीं 40 बांदकामां मोडल्यांत. 72 तल्या 15 गाड्यां कडेन वेवसायीक परवानो आशिल्लो. तिसवाडी म्हालांत सांव मातायस वाठारांत अतिक्रमण केल्ल्या 8 बांदकामांतलें एक मोडलां. भाटी पंचायत वाठारांत अतिक्रमण वा बेकायदो आशिल्ल्या 7 बांदकामांक कुलप मारलां.
गोलती नावेलीच्या 7 बांदकामांतलें एक मोडलां. नेरूल पंचायतीन थंयच्या पुला लागसारच्या रस्त्या कुशीक आशिल्लीं 43 बांदकामां मोडपा खातीर प्रक्रिया सुरू केल्या. ते खातीर वेवसायीक आस्थापनांक नोटीस धाडून गरजेचीं कागदपत्रां दिवपाक सांगलां.
रस्त्याचे कुशीक 357 बेकायदो गाडे
विधानसभेंतल्या एका प्रस्नाक दिल्ले जापे प्रमाण फाटल्या एका वर्सांत गोंयांतल्या विवीध नगरपालिका वाठारांत रस्त्याचे कुशीक आशिल्ल्या 357 गाड्यांची नोंद जाल्या. तातूंत म्हापशें पालिका वाठारांत सगल्यांत चड 45 गाड्यांची नोंद जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
