भांगरभूंय | प्रतिनिधी
सुभाष शिरोडकार : 100 बांदांचें काम चालू आशिल्ल्याचें म्हणणें
भांगरभूंय । प्रतिनिधी
म्हापशें : गोंयाक 2047 मेरेन फावोशें उदक दिवपी राज्य करपाची सरकाराची मोख आसा. ही मोख मेळोवपा खातीर सध्या 100 बांद बांदपाचें काम चालू आसा. हे उदक शेतां खातीर वापरपाक मेळटलें, तशेंच बांयो परतून भरपा खातीर फायद्याचें जातलें, अशें उदकास्रोत मंत्री सुभाष शिरोडकार हांणी सांगलें.
म्हापशेंच्या करासवाडो आनी धुळेर व्हाळांची तशेंच कुचेली झरीची पळोवणी केले उपरांत मंत्री शिरोडकार उलयताले. ह्या वेळार ज्योशुआ डिसोझा आनी उदकास्रोत खात्याचे अधिकारी हाजीर आशिल्ले.
उदकाचे नवे पायपलायनीक लागून 250 एमएलडी उदक चड मेळटलें. तें उदक उत्तर गोंया खातीर फावोशें आसतलें. ह्या उदकाचो सांठो करपाक मेळटलो. हे खातीर म्हापश्यां चार ते पांच एकर जमीन उपलब्ध करून दिवपाची विनवणी आमी उपसभापती कडेन केल्या. तशेंच फुडारांत ते जमनीर उदका शुद्धीकरण प्रकल्पाची लेगीत तजवीज करपाक मेळटली, अशें मंत्री शिरोडकार हांणी सांगलें. उपसभापती ज्योशुआ डिसोझा हांणी सांगलें, पावसाळ्यांत सकयल्या वाठारांतल्या शेत जमनीर व्हड प्रमाणार उदक सांचता. हे खातीर आमी पालिका प्रभाग 3 ते धुळेर मेरेनच्या व्हाळाची पळोवणी केल्या. राष्ट्रीय म्हामार्गाच्या कामाक लागून करासवाडो वाठारांत उदक सांचपी चार सुवातांची पळोवणी केल्या. कुचेरी झरीची लेगीत पळोवणी केल्या. आकय ते धुळेर, कुचेली आनी शिवोली मेरेन वचपी व्हाळ 5 कोटी रुपया खर्च करून परतून बांदतले.
कुचेलेची झर सांबाळपाची गरज : शिरोडकार
कुचेली झर सुंदर आसा. तिचें संरक्षण आमी करपाक जाय. हे आदीं हे झरीचें उदक घरां बांदपाक आनी रांदपा खातीर वापरताले. पूण सध्या झरीचे कुशीक घाणयारें उदक व्हांवता. झरींत वचपीं हें घाणयारें उदक आडावप गरजेचें आसा. हें काम म्हापशें पालिके वतीन करतले, अशें मंत्री सुभाष शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
