भांगरभूंय | प्रतिनिधी
पणजीः गोंय भारतांतलें एक फामाद पर्यटन स्थळ म्हूण वळखतात. कोविड-19 महामारी उपरांत पर्यटन मळार बरीच वाड जाल्ल्याचे दिसून येता. देशी-विदेशी पर्यटकांच्या आगमनांत वाड नोंद जाल्या. 2024 आनी 2025 ह्या काळांत गोंय पर्यटनान नवो विक्रम केलां.
मेळिल्ले आकडेवारी प्रमाण, 2017त गोंयांत 68,95,234 देशांतर्गत आनी 8,90,459 परदेशी पर्यटक आयिल्लें. त्या वेळार वट्ट पर्यटकांचो आंकडो 77,85,693 इतलो आशिल्लो. 2018 आनी 2019 ह्या वर्सांनी पर्यटनांत मध्यम स्वरूपाची वाड जाली आनी वट्ट पर्यटकांचो आंकडो अनुक्रमान 80,15,400 आनी 80,64,400 इतलो नोंद जालो.
महामारी उपरांतल्या काळांत पर्यटन मळार परत एकदां नेट आयलो. 2023त गोंयांत वट्ट 86,28,162 पर्यटक आयिल्लें, तर 2024त हो आंकडो लक्षणीय वाडून 1,04,09,196 इतलो जालो. 2025च्या ताज्या आकडेवारी प्रमाण, गोंयांत 1,02,84,608 देशांतर्गत आनी 5,17,802 परदेशी पर्यटक आयले आनी वट्ट पर्यटकांचो आंकडो 1,08,02,410 इतलो जालो.
मजगतीं, चार्टर विमानांतल्यान येवपी परदेशी पर्यटकांची गोंयच्या इनबाउंड पर्यटनांत महत्वाची भूमिका आसा. 2017त 1,024 चार्टर उड्डाणां वरवीं 2,49,374 परदेशी पर्यटक गोंयांत दाखल जालें. मात 2019 मेरेन हो आंकडो देंवून 799 उड्डाणां आनी 2,16,738 पर्यटक इतलो जालो.
मोपाचे मनोहर आंतरराष्ट्रीय विमानतळ सुरू जाले उपरांत गोंयच्या हवाई संपर्कांत व्हड सुधारणा जाली. 2023त दाबोळी आनी मोपा ह्या दोनूय विमानतळांवयल्यान चार्टर सेवा चालू आशिल्ली, आनी वट्ट ३५६ उड्डाणां वरवीं 72,795 परदेशी पर्यटक आयिल्लें. 2024त हो आंकडो 266 उड्डाणां आनी 58,680 पर्यटक इतलो जालो. 2025 मेरेन 189 चार्टर उड्डाणां वरवीं 40,336 परदेशी पर्यटक गोंयांत आयलें. चार्टर सेवा दाबोळी आनी मोपा ह्या दोनूय विमानतळांवर सुरू आसा.
पर्यटन तज्ञांच्या मतान, सुदारीत मुळावी सुविधा, वाडिल्लो हवाई संपर्क, विविध पर्यटन उपक्रम आनी सरकाराच्या वेगवेगळ्या धोरणांक लागून गोंयच्या पर्यटन मळार बरीच वाड जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
