भांगरभूंय | प्रतिनिधी
पणजीः गोंयची समृद्ध सांस्कृतीक परंपरा, सनातन अध्यात्मीक दायज आनी गोमंतकीय अस्मितेचें संवसारीक दर्शन घडोवपी गोंय अध्यात्मीक महोत्सव अविस्मरणीय अणभव थारतलो. नारीशक्तीच्या फुडारपणा खाला घडोवन येवपी ह्या पर्वाक लागून गोंयचें अध्यात्मीक दायज आंतरराष्ट्रीय पांवड्यार अदीक ठळकपणान अदोरेखीत जातलें अशें, गोंय अध्यात्मीक महोत्सवाच्या आयोजन समितीची अध्यक्ष निलिमा मांद्रेंकार हांणी सांगलें.
गोंय स्पिरीच्युएल महोत्सवा विशीं म्हायती दिवपा खातीर पणजे आपयिल्ले पत्रकार परिशदेंत माद्रेंकार उलयताल्यो. ह्या वेळार केंद्रीय पदाधिकारी शुभक्षण नायक, सुवर्णलता वायंगणकार, रामचंद्र नायक, श्रीराज शेलार, सचीन गांवकर, वेदमुर्ती साईश परब, शिवानंद नायक हजर आशिल्ले.
ह्या इतिहासिक सुवाळ्याक खूबशे महामंडलेश्वर, संत, अध्यात्मीक गुरु, जगद्गुरु शंकराचार्य, विवीध पिठांचे पिठाधिश्वर, अखाड्यांचे संत-महंत तशेंच शासकी मानेस्त हाजीर आसतले अशें मांद्रेंकार हांणी सांगलें.
श्रीदत्त पद्मनाभ पीठ, पिठाधिश्वर पद्मश्री विभूषीत सद्गुरु ब्रह्मेशानंद आचार्य स्वामीजींच्या दिव्य संकल्पनेंतल्यान आनी मार्गदर्शना खाला गोंय अध्यात्मीक महोत्सव 2026 ह्या भव्य-दिव्य महोत्सवाचे आयोजन सगद्गुरु फावंडेशना वरवीं मुख्यमंत्री डॉ. प्रमोद सावंत हांच्या फुडारपणा खाला गोंय सरकार हांच्या पालवान 19 ते 24 फेब्रुवारी 2026 मेरेन गोमंतक भुंयेंत आयोजन करतले अशी म्हायती मांद्रेंकार हांणी दिली.
महोत्सावची सुरवात 19 फेब्रुवारी दिसा सांजे 4.30 वरांचेर संगमपूर, सांगें हांगासर जातली. गोंय अध्यात्मीक महोत्सव तशेंच संगमपूर शिव साम्राज्य समितीच्या आयोजना खाला छत्रपती शिवाजी महाराजांच्या भव्य मुर्तीचें लोकार्पण जातलें. ह्या निमतान श्रीसंगमेश्वर पूजन, संतांच्या हाजिरेंत महाआरती, कलश यात्रा आनी संत आशिर्वचनाची कार्यावळी आयोजीत केल्या अशें मांद्रेंकार हांणी सांगलें.
20 फेब्रुवारीक सांजे 4 वरांचेर पणजी हांगासर ‘गोवा व्हिजन समीट’ खाला पुरस्कार भेटवण सुवाळो आनी परिसंवाद घडोवन हाडटले. 21 फेब्रुवारीक फांतोडेर 6.30 वरांचेर कळंगूट दर्यादेगेर संतपुजन, योगसाधना, सामुदायीक श्रीहनुमान चालीसा पठण, ‘रन फॉर स्पिरिच्युअॅलिटी’ मॅरेथॉन तशेंच संत सान्निध्यात पवित्र समुद्रस्नान जातलें. 22 फेब्रुवारीक सांजे 4 वरांचेर भव्य समुद्र महाआरती, रथयात्रा, सामुदायीक श्रीमद्भगवद्गीता पठण, संतपुजन व पुज्य संतांचे आशिर्वचन, संगीत प्रस्तुती – गजर गोमंतक अशी दिव्य कार्यावळ जातली, अशें मांद्रेंकार हांणी सांगलें.
23 फेब्रुवारीक सांजे 4 वरांचेर पणजी हांगा स्पिरिच्युअल क्रूझ वरवीं म्हादय न्हंयचें पुजन, ‘संगीत सरिता’, सत्कार सुवाळो आनी संत सान्निध्यांत नौका विहाराचें आयोजन जातलें. 24 फेब्रुवारीक सकाळीं 10.30 वरांचेर तपोभूमी हांगासर गौमाता पुजन, देवस्थान आनी संत संमेलन, सद्गुरु भक्ती महायज्ञ आनी दिव्य ब्रह्मानुश्ठान सुवाळ्यांत गोंय अध्यात्मीक महोत्सावची सांगता जातली अशें मांद्रेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
