भांगरभूंय | प्रतिनिधी
हवामान खात्यान जारी केलो येलो अलर्ट
पणजी: हवामान खात्यान 17 आनी 18 जून दिसा गोंयांत कांय वाठारांनी उटंगाराच्या पावसाची शक्यताय उक्तायल्या. ते प्रमाण ह्या दोन दिसां खातीर पावसाचो येलो अलर्ट जारी केला. शुक्रारा राजधानी पणजी सयत पावसान नेटान हजेरी लायली. पावसाक लागून कांय वाठारांनी रस्त्याचेर उदक सांचले. दनपार उपरांत पावस उणो जाला.
हवामान खात्यान दिल्ले म्हायती प्रमाण गोंयांत 24 वरांत सरासरी 1.23 इंच पावसाची नोंद जाल्या. पणजे 2.65 इंच, मुरगांवां 2.07, वाळपय 1.89, मडगांवां 1.65 इंच पावसाची नोंद जाल्या. 1 ते 14 जून मेरेन सरासरी 15.32 इंच पावसाची नोंद जाल्या. ह्या काळांत सादारण 12.84 इंच पावसाची नोंद जाता. पूण अंदूं पावसाचें प्रमाण 19.3 टक्क्यांनी चड आसा.
शुक्रारा पणजे चडांत चड तापमान 31 अंश जाल्यार उण्यांत उणें 24.2 अंश सेल्सिअस तापमानाची नोंद जाल्या. जाल्यार मुरगांव चडांत चड 26.4 अंश जाल्यार उण्यांत उणें तापमान 24.2 अंश सेल्सिअस आशिल्लें. फुडले पांच दीस राज्यांतले तापमान 29 ते 31 अंश सेल्सिअस मजगतीं उरपाची शक्यताय हवामान खात्यान उक्तायल्या.
गोंयांत 1 ते 14 जून मेरेन मडगांवा सगल्यांत चड 20.77 इंच पावसाची नोंद जाल्या. केपें 17.88 इंच, काणकोण 17.85, मुरगांवां 17.68 इंच, दाबोळी 17.05, पणजी 16.80, सांगें 16.33 इंच जाल्यार सांखळे 15.97 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
