भांगरभूंय | प्रतिनिधी
मुख्यमंत्री : वाचनाची आवड, तशेंच गिन्यानाचीं दारां उक्तीं करपाची मोख
भांगरभूंय । प्रतिनिधी
पणजी : गोंयांतली वाचन संस्कृताय घटमूट करपा खातीर आनी गांवगिर्या वाठारांतल्या वाचप्यांक हक्काची माची दिवपा खातीर मुख्यमंत्री डॉ. प्रमोद सावंत हांणी राज्यांत 168 नवीं ई-वाचपघरां स्थापन करपाची म्हत्वाची घोशणा केली. राज्यांतल्या सगल्या ग्रामपंचायतींनी आनी नगरपालिका वाठारांनी हीं ई-वाचपघरां सुरू करतले. आतां मेरेन ह्या महत्वाकांक्षी उपक्रमांतल्यान 20 ई-वाचपघरां चालीक लागल्यात. तळागाळांतल्या लोकां मदीं वाचनाची आवड निर्माण करप आनी गिन्यानाचीं दारां उक्तीं करप हो हाचे फाटलो मुखेल हेतू आसा, अशें मुख्यमंत्र्यान सांगलें.
फोंडें नगरपालिकेचे ई- लायब्ररीचें उक्तावण मुख्यमंत्र्यां हस्तुकीं जालें. ह्या वेळार ते मुखेल सोयरे ह्या नात्यान उलयताले.
ह्या प्रकल्पा खातीर थळाव्या स्वराज्य संस्थांक फुडाकार घेवपाचो उलो मारलो. आमचे कडेन भागांतल्या ई-वाचपघरांची उदरगत आनी तांचो योग्य सांबाळ करपाची जापसालदारी ह्या संस्थां कडेन दिल्या. थळाव्या पांवड्यार ई-वाचपघरांचें जाळें विणल्यार तरणाट्यां पसून जाण्ट्यां मेरेन सगल्यांकूच हाचो लाव जातलो, असो विस्वास मुख्यमंत्र्यान उक्तायलो. तशेंच फकत पुस्तकां उपलब्ध करून दिवप इतल्याचेरूच मर्यादीत उरनासतना, एक समृद्ध वाचन संस्कृती तिगोवन दवरपा खातीर हें एक व्हड पावल मानतात, अशें तांणी सांगलें.
भौशीक वाचपघरां वांगडाच गोंयाक डिजिटल क्रांती कडेन जोडपा खातीर मुख्यमंत्र्यांनी ‘ई-लायब्ररी’ प्रकल्पाचीय घोशणा केल्या. केंद्र सरकाराच्या विशेश अनुदानांतल्यान हो प्रकल्प पुराय राज्यभर चालीक लायतले. ह्या डिजिटल वाचपघराक लागून गोंयांतल्या विद्यार्थ्यांक आनी वाचकांक दुर्मीळ पुस्तकां तशेंच शिक्षणीक संसाधनां एका क्लिकार उपलब्ध जातलीं. ऑनलायन माध्यमांतल्यान शिक्षणाच्यो संदी विस्तारपा खातीर हो उपक्रम सामको फायद्याचो थारतलो. शार आनी गांवगिर्या अश्या दोनूय वाठारांनी दर्जेदार ई-वाचपघर सेवा पावपा खातीर शासन बांदील आसा. डिजिटल आनी प्रत्यक्ष वाचपघरांच्या संगमांतल्यान गोंयचो शिक्षणीक दर्जो वयर सरपाक मजत जातली, अशें मुख्यमंत्र्यान ह्या वेळार स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
