भांगरभूंय | प्रतिनिधी
पणजीः गोंयांतल्या 13 केंद्रांतल्या 8 केंद्रांनी 150 इंचा वयर पावस पडला. तातूंत वाळपय, सांगें, केपें, सांखळी, पेडणें, पोरणें गोंय, फोंडें आनी काणकोण ह्या केंद्रांचो आस्पाव जाता. गोंयांत 1 जून ते 4 सप्टेंबर ह्या काळांत सरासरी 158.85 इंच पावस पडला. अंदूं पावसाचें प्रमाण 46.7 टक्के चड आसा. हवामान खात्यान येलो अलर्ट जारी करून 5 ते 7 सप्टेंबर ह्या काळांत मध्यम पावस पडपाची शक्यताय सांगल्या.
बुधवारा राज्यांत तुरळक पावस पडपाची नोंद जाल्या. राज्यांत दीसभर पावसाचो खेळ चालूच आशिल्लो. बुधवारा पणजे चडांत चड तापमान 2 अंश वाडून 31.7 अंश जाल्यार मुरगांवां चडांत चड तापमान 2.3 अंश वाडून 31.8 अंश जालें. पणजेचें उण्यांत उणें तापमान 25.8 अंश आनी मुरगांवां उण्यांत उणें तापमान 26 अंश आशिल्लें. फुडल्या पांच दिसां खातीर राज्यांत चडांत चड तापमान 31 ते 32 अंश आनी उण्यांत उणें तापमान 26 अंश आसपाची शक्यताय आसा.
1 जून ते 4 सप्टेंबर ह्या काळांत राज्यांत सगळ्यांत चड 206.23 इंच पावस वाळपय पडला. ताचे उपरांत सांगेंत 194.90 इंच, सांखळे 174.19 इंच, केपेंत 172.41 इंच, पेडण्यां 163.49 इंच, पोरणें गोंया 156.51 इंच, फोंड्यां 155.38 इंच, काणकोणां 150.54 इंच, पणजे 147.19 इंच, मडगांवां 146 इंच., मुरगांवां 138.40 इंच आनी दाबोलींत 123.93 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
